USAMUWELI II 22

₂Yehova, ngxondorha yam, mboniselo yam, msizi wam mna lo,

₃Thixo oliliwa lam, endizímela ngalo;

Ngweletshetshe yam, luphondo losindiso lwam,

Ngxonde yam, ndawo yokusabela kwam,

Msindisi wam, undisindisa ekugonyamelweni.

₄Ndinqula uYehova ongowokudunyiswa,

Ndiyasindiswa ke ezintshabeni zam.

₅Ákundijikela amáza alwayo okufa,

Yakundidandathekisa imilambo yobutshijolo,

₆Zakundibhijela izintya zelabafileyo,

Zakundirhintyela izirhintyelo zokufa,

₇Ekubandezelekeni kwam, ndanqula uYehova,

Ndamnqula uThixo wam:

Waliva etempileni yakhe izwi lam,

Ukuzibika kwam kwafika ezindlebeni zakhe.

₈Lahexa ke lanyikima ihlabathi,

Iziseko zezulu zagungqa,

Zahexa ngokuba enomsindo.

₉Kwathi thaphu umsi emathatheni akhe,

Wadla umlilo uphuma emlonyeni wakhe,

Avutha amalahle, ephuma kuwo.

₁₀Wawathoba amazulu, wehla,

Yangamafu amnyama phantsi kweenyawo zakhe.

₁₁Wakhwela ekerubhini,• waphaphazela,

Wabonakala esemaphikweni omoya.

₁₂Wamisa ubumnyama ngeenxa zonke kuye, bayiminquba,

Intlanganisela yamanzi, neengqimba zamafu.

₁₃Ekuqaqambeni okuphambi kwakhe

Kwavutha amalahle omlilo.

₁₄Wadudumisa emazulwini uYehova,

Oseyangweni walikhupha izwi lakhe.

₁₅Wathuma iintolo, wabaphangalalisa;

Umbane, wabadubaduba.

₁₆Kwabonakala imiphantsi yolwandle,

Kwatyhileka iziseko zelimiweyo

Ngokukhalima kukaYehova.

Ngokufutha komoya womsindo wakhe.

₁₇Wolula isandla, ephezulu, wandibamba,

Wandirhola emanzini amaninzi.

₁₈Wandihlangula elutshabeni lwam olunamandla,

Kwabandithiyileyo, ngokuba bebomelele kunam.

₁₉Bandifikela ngemini yokusindeka kwam,

Waba sisixhaso kum uYehova.

₂₀Wandikhuphela endaweni ebanzi,

Wandihlangula ngokuba endinonelele.

₂₁UYehova wandiphatha kakuhle ngokobulungisa bam,

Wandibuyisela ngokuhlambululeka kwezandla zam.

₂₂Ngokuba ndazigcina iindlela zikaYehova,

Andemka ngokungendawo kuThixo wam.

₂₃Ngokuba onke amasiko akhe aphambi kwam;

Nemimiselo yakhe, andityekanga kuyo.

₂₄Ndandingogqibeleleyo kuye,

Ndazinqanda ebugwenxeni bam.

₂₅Wandibuyisela ke uYehova ngokobulungisa bam,

Ngokobunyulu bam, phambi kwamehlo akhe.

₂₆Kowenceba ùzenza owenceba,

Kwigorha eligqibeleleyo ùzenza ogqibeleleyo.

₂₇Kozenze nyulu ùzenza onyulu,

Kojibilizayo ùzenza onobuqhokolo.

₂₈Abantu abaziintsizana ùyabasindisa,

Amehlo akho ajongene nabaqwayingileyo, ubathobe.

₂₉Kuba ùsisibane sam, wena Yehova,

UYehova ukhanyisela ubumnyama bam.

₃₀Kuba ngawe ndigila impi,

NgoThixo wam nditsiba iindonga.

₃₁UThixo yena — igqibelele indlela yakhe,

Ilizwi likaYehova linyibilikisiwe,

Úyingweletshetshe kubo bonke abazímela ngaye.

₃₂Ngokuba ngubani na onguThixo, ingenguye uYehova?

Ngubani na oliliwa, ingenguThixo wethu?

₃₃UloThixo uligwiba lam elinamandla,

Umalathisayo ogqibeleleyo indlela yakhe;

₃₄Uzifanisayo iinyawo zam nezamaxhamakazi,

Undimisayo emimangweni yam;

₃₅Uzifundisayo ukulwa izandla zam,

Zigobe isaphetha sobhedu iingalo zam.

₃₆Ùndinike ingweletshetshe yosindiso lwakho,

Ukundiphulaphula kwakho kwandikhulisa.

₃₇Ùwenzele indawo ebanzi amanyathela am phantsi kwam,

Amaxhwele am akahexa.

₃₈Ndiya kuzisukela iintshaba zam, ndizitshabalalise,

Ndingabuyi zide ziphele.

₃₉Ndiya kuzigqiba, ndiziphaluse, zingavuki,

Ziwe phantsi kweenyawo zam.

₄₀Ùndibhinqise ukukhaliphela imfazwe,

Ùbaguqisa phantsi kwam abasukela phezulu kum.

₄₁Iintshaba zam uzenzé zandinikela ikhosi,

Abandithiyayo ndababhangisa.

₄₂Bayabhekabheka, kungabikho msindisi;

KuYehova, angabaphenduli.

₄₃Ndibacola njengothuli lomhlaba,

Ndibacumza, ndibaxovula njengodaka lwendlela, ndibasasaze.

₄₄Ùndisiza ekubambaneni kwabantu bam nam,

Ùndigcina ndibe yintloko yeentlanga.

Abantu ebendigabazi baya ndikhonza.

₄₅Oonyana bolunye uhlanga baya kundilulamela, behanahanisa,

Bandithòbele besave ngeendlebe.

₄₆Oonyana bolunye uhlunga bayantshwenya,

Baphuma benovalo ekuvingcelweni kwabo.

₄₇UYehova uhleli, lelokubongwa iliwa lam,

Aphakanyiswe uThixo, iliwa losindiso lwam.

₄₈UloThixo undiphindezelayo,

Uzihliselayo phantsi kwam izizwe,

₄₉Undikhuphayo ezintshabeni zam;

Undiphakamisayo kwabasukela phezulu kum;

Undihlangulayo kumfo ogonyamelayo.

₅₀Ngenxa yoko ndiya kubulela kuwe, Yehova, phakathi kweentlanga,

Ndivume kwigama lakho.

₅₁Ulokhulisa usindiso lokumkani wakhe;

Owenzayo inceba kumthanjiswa wakhe,

KuDavide, nakwimbewu yakhe kude kuse ephakadeni.