UYOBHI 15

₂Isilumko siphendula ngokwazi okungumoya na,

Sizalise umbilini waso ngolophu lwasempumalanga na?

₃Khe sohlwaye ngentetho engancediyo na,

Nangokukhuluma okungasizi lutho na?

₄Phezu koko wena utshitshise ukoyika uThixo,

Wanciphisa ukuthelekelela phambi koThixo;

₅Ngokuba ubugwenxa bakho bufundisa umlomo wakho,

Unyulé ulwimi lwabanobuqhophololo.

₆Ngumlomo wakho okugwebayo, asindim;

Ngumlomo wakho okuphendulayo.

₇Nguwe na owazalwa kuqala, waba ngumntu?

Waveliswa ngenimba ngaphambi kweenduli?

₈Wawukho na egquguleni likaThixo?

Wabutsalela kuwe na ubulumko obo?

₉Wazi ntoni na, esingayaziyo thina?

Uqondé ntoni na, engekhoyo nathi kuthi?

₁₀Kunje thina siziingwevu namaxhego,

Amadala nakuyihlo ngokuzalwa.

₁₁Zincinane na kuwe iintuthuzelo zikaThixo,

Nelizwi elithethe kuhle nawe?

₁₂Imka nantoni na intliziyo yakho?

Aphanyazela ntoni na emehlo akho,

₁₃Le nto ukuguqulela kuThixo ukufutha kwakho,

Ukhuphe ukuthetha emlonyeni wakho?

₁₄Uyintoni na umntu, ukuba aqaqambe?

Abe lilungisa ozelwe ngumfazi?

₁₅Yabona, nabangcwele bakhe àkakholwa ngabo,

Nezulu àliqaqambile emehlweni akhe.

₁₆Úbeke phi na olisikizi, oyimbozisa;

Umntu lo, usela ubugqwetha njengamanzi?

₁₇Ndokuxelela, ndiphulaphule;

Endikubonileyo ndikubalisele;

₁₈Okwaxelwa zizilumko,

Kuvela kooyise, zaza azakufihla.

₁₉Lanikwa zona zodwa ilizwe,

Akwangena wasemzini phakathi kwazo.

₂₀Yonke imihla yakhe, ongendawo uyazibhijabhija;

Inani leminyaka liqwetyelwe ingqwangangqwili.

₂₁Kumi ilizwi lokunkwantyisa ezindlebeni zakhe,

Eluxolweni úyamfikela umbhuqi.

₂₂Akakholwa ukuba uya kubuya emnyameni;

Ke yena uqwetyelwe ikrele.

₂₃Uphalaphalela ukutya, esithi, Kuphi na?

Úyazi ukuba ulungiselwe imini yobumnyama ecaleni kwakhe.

₂₄Udandathekiswa yimbandezelo nayingcutheko;

Ithi gaga phezu kwakhe, njengokumkani olungiselwe isiphendu sokulwa.

₂₅Ngokuba esolulele kuThixo isandla sakhe,

Wazenza igorha kuSomandla:

₂₆Wamgila, eyolule intamo,

Ngamaqhubu angqingqwa eengweletshetshe zakhe;

₂₇Ngokuba egubungele ubuso bakhe ngamanqatha akhe,

Watyeba wanamanqatha emihlubulweni yakhe.

₂₈Wema imizi engamanxuwa,

Nezindlu ezingezakuhlalwa,

Ezamiselwa ukuba zibe yimiwewe.

₂₉Akayi kuba sisityebi, abuyi kuma ubutyebi bakhe;

Inzuzo yakhe ayiyi kunaba emhlabeni.

₃₀Akayi kusinda ebumnyameni;

Igatya lakhe liya komiswa ngedangatye;

Emke ngokufutha komlomo wakhe.

₃₁Okhohliswayo makangathembeli kumampunge;

Kuba inkohlakalo iya kuba lulwanano lwakhe.

₃₂Kozaliseka oko ingekabi yimini yakhe,

Isebe lakhe lesundu lingabi luhlaza.

₃₃Wówisa njengomdiliya uwisa iidiliya zawo ezikrwada;

Avuthulule njengomnquma intyantyambo yawo.

₃₄Kuba ibandla leentshembenxa liya kuba njengento embatshileyo,

Umlilo uzitshise iintente zokucenga.

₃₅Bakhawula ububi, bazale ubutshinga,

Umbilini wabo usebenze inkohliso.