UYOBHI 18

₂Kunini na nikuzingela ukuthetha?

Qondani, sothetha emveni koku.

₃Yini na ukuba kuthiwe sinjengeenkomo,

Sibe ziinqambi emehlweni akho?

₄Wena uziqwengayo ngomsindo wakho,

Liya kushiywa ihlabathi ngenxa yakho, lingamiwa na?

Likhwelèle iliwa endaweni yalo?

₅Noko nokukhanya oku kongendawo kuya kucinywa,

Lingabi mhlophe ilangatye lomlilo wakhe.

₆Ukukhanya kuya kwenziwa mnyama ententeni yakhe,

Nesibane sakhe sicinywe phezu kwakhe.

₇Ukunyantsula kwakhe kuya kuxinwa,

Limphose phantsi kwaelakhe iqhinga.

₈Kuba uqhutyelwe emnatheni ziinyawo zakhe,

Uhamba phezu kwesibatha.

₉Umgibe umbambisa ngesithende,

Limbambise isango.

₁₀Lufihliwe emhlabeni ulutya lwakhe,

Ukuthiwa hlasi kwakhe kusengqushwini.

₁₁Uyadandathekiswa ngeenxa zonke kukukhwankqisa,

Kumbhebhethe, kuthane mbende naye.

₁₂Amandla akhe aya kuphela kukulamba,

Ukusindeka kulungiselwe ukujingxela kwakhe.

₁₃Kudla iziqendu zolùsu lwakhe;

Udla iziqendu zakhe owamazibulo wokufa.

₁₄Iyancothuka ententeni yakhe inkoloseko yakhe,

Ahanjiselwe kukumkani wokukhwankqisa.

₁₅Kuhleli ententeni yakhe izinto zasemzini;

Kugcwayelwa isulfure ekhayeni lakhe.

₁₆Ngaphantsi ziya koma iingcambu zakhe,

Ngaphezulu abune amasebe akhe.

₁₇Isikhumbuzo sakhe siya kudaka ehlabathini,

Angabi nagama nasemaphandleni.

₁₈Baya kumtyhala ekukhanyeni, aye ebumnyameni,

Aphekuzwe kwelimiweyo.

₁₉Akayi kuba nanyana nanzala ebantwini bakowabo,

Kungabikho usindileyo emizini yakhe.

₂₀Bomangaliswa yimini yakhe abahleli entshonalanga,

Nabasempumalanga babanjwe kukuba namanwele.

₂₁Inene, injalo iminquba yabanobugqwetha,

Injalo indawo yongamaziyo uThixo.