UYOBHI 19

₂Kunini na nisenza isingqala kumphefumlo wam,

Nindityumza ngokuthetha?

₃Ezi zihlandlo zilishumi nindihlazile;

Ànidanile, niyandikhwankqisa.

₄Khona ke ndithe okunene ndalahleka,

Kuhleli nam ukulahleka kwam.

₅Ukuba okunene nithe nazikhulisa kum,

Nandohlwaya ngengcikivo yam:

₆Yazini ngoko, ukuba nguThixo ondigobileyo,

Wandirhawula ngomnatha wakhe.

₇Yabona, ndiyakhala, ndithi, Ndagonyamelwa! kungasatyelwa;

Ndiyazibika, kungabikho kulungisa.

₈Úyibiyile indlela yam, akwabakho ukugqitha;

Ezingqushwini zam wamisa ubumnyama.

₉Úndihlube uzuko lwam,

Wasusa isithsaba sentloko yam.

₁₀Úndidilizile ngeenxa zonke, ndemka;

Walincothula njengomthi ithemba lam.

₁₁Úwuvuthise ngakum umsindo wakhe,

Wandibalela ekuthini ndingowababandezeli bakhe.

₁₂Zeza kunye izimpi zakhe,

Zandifumbela indlela yazo,

Zayizunguleza ngeenxa zonke intente yam.

₁₃Abazalwana bam úbasé kude kum,

Abandaziyo sebengabasemzini kanye kum.

₁₄Izalamane zam zindishiyile,

Nabazana nam bandilibele.

₁₅Abahlala endlwini yam, nabakhonzazana bam,

Bandibalele ekuthini ndingowasemzini,

Ndingowolunye uhlanga emehlweni abo.

₁₆Ndibiza umkhonzi wam, angasabeli;

Ndimbongoze ngomlomo wam.

₁₇Umoya wam umkruqule umkam;

Ndiyanuka kubantwana besizalo esandizalayo.

₁₈Namakhwenkwe ayandicekisa;

Ndakusuka, asuka athethe ngam.

₁₉Ndilisikizi kumakholwane am,

Nabendibathanda bandiguqukele.

₂₀Amathambo am atshele elùswini lwam nasenyameni yam;

Ndisindé macebetshu.

₂₁Tarhuni, tarhuni, zihlobo zam;

Kuba isandla sikaThixo sindiphethe.

₂₂Yini na ukuba nindisukele njengoThixo,

Ninganeli yinyama yam?

₂₃Akwaba ngoku ebebhalwa amazwi am!

Akwaba ebekrolwe encwadini!

₂₄Ngentlabo yesinyithi, atyhidwe ngelothe,

Axholelwe eweni nanini!

₂₅Ke mna ndiyazi ukuba umhlawuleli wam uhleli;

Engowokuphela, uya kusuka éme phezu kothuli lwehlabathi.

₂₆Emveni kokuba ulùsu lwam ludlavulwe lwanje,

Ingasekho inyama yam, ndiya kumbona uThixo,

₂₇Endiya kuzibonela mna ngokwam;

Amehlo am ambone, ingabi wumbi.

Ziyaphelelwa izintso zam ngaphakathi kwam.

₂₈Ukuba nithi, Simsukela ngani na?

Ingcambu yaloo nto ifunyenwe kum:

₂₉Nxunguphalani likrele;

Kuba ubushushu, bubo ubugwenxa obufanele ikrele,

Ukuze nazi ukuba kukho umgwebo.