UYOBHI 29

₂Yoo! Andaba bendineenyanga ezinjengezaphambili,

Njengemihla abendigcinile uThixo;

₃Xa ukukhanya kwesibane sakhe bekuphezu kwentloko yam,

Xa ngokukhanya kwakhe bendibuhamba ubumnyama;

₄Njengoko bendinjalo ngemihla yam yokwindla,

Oko ukucweya kukaThixo bekuphezu kwentente yam;

₅Oko uSomandla ebesenam,

Bengeenxa zonke kum abantwana bam;

₆Oko ebehlanjwa amabanga am ngamasi,

Iliwa lindithululela imijelo yeoli.

₇Xa ekuphumeni ngesango bendinyuka ukuya kuwo umzi,

Ndimise isihlalo sam endaweni yembutho,

₈Ándibona amadodana, azimela,

Asuka amaxhego, ema.

₉Abathetheli bakuyeka ukukhuluma,

Babeka isandla emlonyeni.

₁₀Ilizwi leenganga lazímela,

Nolwimi lwazo lwanamathela ekhuhlangubeni lazo,

₁₁Kuba indlebe yeva, yathi ndinoyolo;

Iliso labona, landingqinela.

₁₂Kuba bendisiza iintsizana ezizibikayo,

Neenkedama, noswele umncedi.

₁₃Intsikelelo yabadakayo ibindizela,

Nentliziyo yomhlolokazi bendiyimemelelisa.

₁₄Ubulungisa bendibambatha bundambathe;

Lwaba njengengubo yokwaleka nonkontsho ugwebo lwam.

₁₅Bendingamehlo kwimfama,

Bendiziinyawo kwisiqhwala;

₁₆Bendinguyise kumahlwempu,

Netyala lendingabaziyo bendiligocagoca.

₁₇Bendiwaphula amabamba ogqwethayo,

Bendilikhupha emazinyweni akhe ixhoba.

₁₈Ndathi ke, Ndiya kuphuma umphefumlo kunye nendlu yam,

Ndiyandise imihla yam njengentaka engafiyo.•

₁₉Ingcambu yam iya kuvulelwa amanzi,

Ulale umbethe emasebeni am.

₂₀Uzuko lwam luya kuhlala lulutsha kum,

Sihlaziyeke isaphetha sam esandleni sam.

₂₁Babendiphulaphula, balindele,

Bathi tu ecebeni lam.

₂₂Emva kwelizwi lam babengaphindi bathethe,

Kubachaphazele ukukhuluma kwam.

₂₃Babendilinda njengemvula,

Imilomo yabo bayakhamisele eyasekwindla.

₂₄Bendibancumela, bencamile;

Ukukhanya kobuso bam bangakusanganisi.

₂₅Bendibanyulela indlela, ndihlale ndiyintloko;

Bendihlala njengokumkani phakathi komkhosi,

Njengothuthuzela abenza isijwili.