UYOBHI 30

₁Kungoku bayandihleka abancinane kunam ngemihla,

Abayise babo ndibe ndicekisa nokubabeka nezinja zomhlambi wam.

₂Khona abengába ngawantoni na kum amandla ezandla zabo,

Abaphelelwe ngamandla?

₃Bathe ngokuswela nokulamba banqina,

Abo banqabi bomqwebedu,

Bobumnyama bentshabalala yakwantshabalala;

₄Abo baqhawula imbuwa ematyholweni,

Abasonka siyingcambu yonwele.

₅Bayagxothwa phakathi kwabantu;

Bahlatyelwa umkhosi ngathi ngamasela;

₆Bahlale ezihlanjeni ezingcangcazelisayo,

Emingxunyeni yomhlaba nasemaweni.

₇Babhomboloza phakathi kwamatyholo,

Bafumbalala phantsi kwamarhawu,

₈Bengoonyana bezidenge kwanoonyana babangenagama,

Ababethwa bemke ezweni.

₉Kungoku ndiyingoma yabo.

Ndaba kukukhuluma kwabo.

₁₀Ndilisikizi kubo, bakude nam;

Abawanqandi amathe ebusweni bam.

₁₁Kuba úlucombulule uthàmbo lwam, wandicinezela,

Bawuyeka umkhala phambi kwam.

₁₂Ngasekunene kuphakama ubuvuvana;

Batyhala iinyawo zam,

Bandifumbele umendo wabo wokusindeka.

₁₃Bayenza amagqagala indlela yam,

Bancedisa ukweyela kwam,

Abangenamncedi.

₁₄Ukuza kwabo ngathi bagqobhoza ithuba elibanzi eludongeni,

Bagaleleka kum nokuthi golokongqo kwalo.

₁₅Kuguqukéle kum ukukhwankqisa,

Kubusukela ubunene bam njengomoya;

Kudlulé njengelifu ukusindiswa kwam.

₁₆Kungoku uziphalazela phakathi kwam umphefumlo wam;

Indibambile imihla yeentsizi.

₁₇Ubusuku buphehla amathambo am, aqhiwuke kum;

Iintlungu ezindidlayo azipheli.

₁₈Ngobukhulu bamandla sizenzé sasisimbi isambatho sam,

Sithe nca kum njengomqala wengubo yam yangaphantsi.

₁₉Úndijulele eludakeni,

Ndafana nothuli nothuthu.

₂₀Ndiyazibika kuwe, ungasabeli;

Ndisuka ndime, undijonge.

₂₁Ùzenza isijorha kum;

Unditshutshisa ngamandla esandla sakho.

₂₂Undifukulela emoyeni, undikhwelisa kuwo,

Undibhangise nokuzongoma kwawo.

₂₃Kuba ndiyazi ukuba uya kundibuyisela ekufeni,

Endlwini yokuhlangana kwabaphilileyo bonke.

₂₄Kodwa ekuthini bhuma, umntu akoluli sandla na,

Azibike ngenxa yoko elishweni lakhe?

₂₅Khona andimlilelanga yini na omini zinobubi?

Úbungenalusizi na umphefumlo wam ngenxa yehlwempu?

₂₆Kuba ndathemba okulungileyo, kweza okubi;

Ndalinda ukukhanya, kweza isithokothoko.

₂₇Amathumbu am abila, akayeka;

Yandihlangabeza imihla yeentsizi.

₂₈Ndahamba ndinezimnyama zokuzila, akwabakho langa;

Ndaphakama ebandleni, ndazibika.

₂₉Ndingumzalwana weempungutye,

Nomlingane weenciniba.

₃₀Ulùsu lwam luyadlubhuka kum, lumnayama.

Namathambo am atshile kukoma.

₃₁Uhadi lwam lwaba sisijwili,

Ugwali lwam lwaba lilizwi labalilayo.