UYOBHI 39

₁Ùyalazi na ixesha lokuzala kwamagogo asemaweni,

Ugqale ukuzùza kwamaxhamakazi?

₂Ùyazibala na iinyanga azizalisayo,

Ulazi na ixesha lokuzala kwawo?

₃Uyaguqa, azale,

Akhuphe inkonyana.

₄Ayomelela amankonyana awo, akhula emathafeni,

Aphuma, angabi sabuya.

₅Ngubani na olindululeyo iesile lasendle likhululekile?

Iimbophelelo ze-esile elindwebileyo, ngubani na ozithukululeyo,

₆Endilimisele inkqantosi ukuba ibe yindlu yalo,

Neendawo ezinetyuwa zibe likhaya lalo?

₇Liyayihleka ingxokolo yomzi,

Aliyiva ingxolo yomqhubi.

₈Umfuno weentaba bubutyani balo,

Lilanda lonke uhlaza.

₉Yovuma na inqu ukukukhonza,

Ilale esitalini sakho?

₁₀Unokuyibopha na inqu emqeleni ngomqokozo wayo,

Iqwakanise iintili, ikulandela?

₁₁Wòkholosa na ngayo, ngokuba emakhulu amandla ayo,

Ukushiye nayo ukuxelenga kwakho?

₁₂Ùnokukholwa na kuyo, ukuba yoyigodusa imbewu yakho,

Ibuthele esandéni sakho?

₁₃Iphiko lencinibakazi liyaphapha;

Lunenceba yengwamza na ke usiba lwayo, noboya bayo?

₁₄Hayi bo! Iwashiya emhlabeni amaqanda ayo,

Ifukamele eluthulini;

₁₅Ilibale ukuba unyawo lowatyumza,

Nerhamncwa lasendle lowanyathela.

₁₆Iyawabukula amathole ayo ngathi asingawayo,

Kuphalale ukuxelenga kwayo, ingaxhali.

₁₇Ngokuba uThixo wenzé yabulibala ubulumko,

Akayabela ingqondo.

₁₈Xesha limbi izibetha iphakame,

Ilihleke ihashe nomkhweli walo.

₁₉Linikwa nguwe na ihashe ubukroti?

Ùyambathise intamo yalo ngobuyakayaka?

₂₀Nguwe na oliqakathisa njengenkumbi?

Isandi somfutho walo siyothusa.

₂₁Liyagquba entilini ngamanqina, lenze amagqasi ngamandla;

Liphuma likhawulele umkhosi onesikrweqe.

₂₂Liyakuhleka ukunkwantya; aliqhiphuki mbilini;

Alijiki phambi kwekrele.

₂₃Úrhashaza phezu kwalo umphongolo,

Nentshuntshe ebengezelayo, nenkcula.

₂₄Ngentshakavu nangengcwangu liginya ilizwe;

Alimi kwakuvuthelwa isigodlo.

₂₅Ókuvuthela sivuthelwayo isigodlo, lisuka ngathi lithi, Ngxatsho ke!

Lisezela imfazwe kwakude,

Nokududuma kwabathetheli, nokufunza.

₂₆Intambanane iphaphazela ngengqondo yakho na,

Yolule amaphiko ayo, ibheke ezantsi?

₂₇Kungomthetho wakho na, ukuba ixhalanga linyuke,

Liyiphakamise indlu yalo,

₂₈Lihlale engxondorheni, lilale

Etsolweni lengxondorha, nasemboniselweni?

₂₉Lilapho lihlola ukudla;

Amehlo alo ondele kude.

₃₀Amathole alo afunxa igazi;

Nalapho bakhona abangxwelerhiweyo, likhona nalo.