UYOBHI 8

₂Kunini na uthetha izinto ezinje?

Engumoya omkhulu amazwi omlomo wakho?

₃UThixo angákwenza gwenxa na okusesikweni?

USomandla angabenza gwenxa na ubulungisa?

₄Ukuba abantwana bakho bathe bamona yena,

Wabanikela esandleni sesikreqo sabo;

₅Ukuba ùthe wamfuna ngenkuthalo uThixo wena,

Watarhuzisa kuSomandla;

₆Ukuba uthe wacoceka, wathi tye wena,

Okunene, wóvuka ngoku ngenxa yakho,

Alisikelele ikhaya lobulungisa bakho;

₇Kuthi ukuqala kwakho kube kuyinto encinane,

Ukuphuma kwakho kube kukhulu kakhulu.

₈Kuba khawubuze kwisizukulwana saphambili;

Uxunele ekugocagoceni kooyise baso:

₉Kuba singabezolo thina, asinakwazi;

Ngokuba isisithunzi imihla yethu ehlabathini.

₁₀Abayi kukuyala na abo, bathethe kuwe,

Barhole amazwi entliziyweni yabo? bathi,

₁₁Iyakhula na imikhanzi, kungekho mgxobhozo?

Iyahluma na ingcobo, kungekho manzi?

₁₂Iseluhlaza, ingekaphiwa,

Yoyiphangela ingca yonke ngokoma.

₁₃Únjalo umendo wabo bonke abamlibalayo uThixo,

Nethemba lomkhohlisi liyadaka;

₁₄Ngokuba ukugasa kwakhe kuyanqunyulwa;

Yindlu yesigcawu ukukholosa kwakhe.

₁₅Wayama ngendlu yakhe, ingemi;

Úbambelela kuyo, ingahlali.

₁₆Úluhlaza phambi kwelanga,

Namagatya akhe ayaqabela eludongeni lwentsimi yakhe;

₁₇Iingcambu zakhe zijijene emweweni,

Utyhudisa ezingcambeni zamatye.

₁₈Ukuba uthe wamginya endaweni yakhe,

Yomkhanyela ithi, Andikubonanga.

₁₉Yabona, yiyo le imihlali yendlela yakhe,

Ize eluthulini kuntshule abanye.

₂₀Yabona, uThixo akamcekisi ogqibeleleyo,

Akababambi ngesandla abenzi bobubi.

₂₁Úya kuwuzalisa umlomo wakho ngokuhleka,

Nemilebe yomlomo wakho ngokuduma:

₂₂Abakuthiyayo baya kwambatha ukudana,

Ingabi sabakho intente yabangendawo.