IZILILO 1

₁Yoo! Uhleli wodwa, umzi obantu baye bebaninzi;

Obe umkhulu ezintlangeni

Usuke waba njengomhlolokazi; umthethelikazi emazweni

Usuke waba ngofakwa uviko.

₂Ulila elilile ebusuku, iinyembezi zakhe zisezidleleni zakhe;

Akanamthuthuzeli kuzo zonke izithandane zakhe;

Onke amakholwane akhe ammenezelele,

Aba lutshaba kuye.

₃UYuda uye ekuthinjweni, ephuma ezintsizini nasezinkonzweni ezininzi;

Yena uhleli ezintlangeni, akafumani kuphumla;

Bonke abamsukelayo bamfikele ezingxingongweni.

₄Iindlela zaseZiyon zenza isijwili, ngokungabikho kwabayà emithendelekweni;

Onke amasango ayo akanamntu, ababingeleli bayo bayancwina;

Iintombi zayo zinosizi, yona ke kukrakra kuyo.

₅Ababandezeli bayo basuka bayintloko; iintshaba zayo zinobunqobo;

Ngokuba uYehova uyenzé yanosizi ngenxa yokreqo lwayo oluninzi;

Abantwana bayo bemkile, bathinjiwe, baqhutywa ngumbandezeli.

₆Buphumile entombini enguZiyon bonke ubungangamsha bayo;

Abathetheli bayo baba njengamaxhama angafumani dlelo,

Ahamba engenamandla phambi komsukeli.

₇IYerusalem iyazikhumbula, ngemini yeentsizi zayo neyokudinga kwayo,

Zonke izinto zayo ezinqwenelekayo ebinazo kwakwiimini zamandulo,

Ekuweni kwabantu bayo esandleni sombandezeli, ingenamncedi;

Ababandezeli bayo báyibona, bakúhleka ukucinywa kwayo.

₈IYerusalem asikuko nokuba yonile yona; ngenxa yoko yaba lubhorha;

Bonke ababeyizukisa bayayicukuceza, ngokuba baboné ubuzé bayo;

Nayo ngokwayo iyancwina, ibuye umva.

₉Ubunqambi bayo busezingutyeni zayo ezirhuqayo, ayilikhumbulelanga ikamva layo;

Yehla ke ngokubalulekileyo; ayinamthuthuzeli;

Ithi, Zikhangele, Yehova, iintsizi zam; ngokuba utshaba luzikhulisile.

₁₀Umbandezeli usolule isandla sakhe phezu kwezinto zayo zonke ezinqwenelekayo;

Kuba ibona iintlanga zingené engcweleni yayo,

Owawuwise umthetho wena, ukuba zingangeni ebandleni lakho.

₁₁Bonke abantu bayo bayancwina, befuna isonka;

Barholé izinto zabo ezinqwenelekayo ngenxa yesonka, ukuze bawubuyise umphefumlo;

Bóna, Yehova, ukhangele, ukuba ndisuke ndacukucezeka.

₁₂Akunto na oku kuni nonke, nina nidlula ngendlela?

Bhekani nibone, ukuba kukho na umvandedwa onjengomvandedwa wam, endiwenziweyo,

Athe uYehova wandenza lusizi ngemini yokuvutha komsindo wakhe.

₁₃Engaphezulu, uthumé umlilo emathanjeni am, wawanyathela;

Uzanekele umnatha iinyawo zam, wandibuyisa umva;

Undenzé inxuwa, yonke imini ndityhafile.

₁₄Idyokhwe yezikreqo zam ibotshwe sisandla sakhe;

Zibhijelene, zenyuka zaba semqaleni wam, zawakhubekisa amandla am;

INkosi yam indinikele ezandleni zabo ndingenakumisa kubo.

₁₅INkosi yam izitshitshisile zonke iimbalasane zam eziphakathi kwam;

Indimemele umthendeleko, ukuba yaphule amadodana am.

INkosi yam ixovule inkazana enguYuda, ngokungathi kusesixovulweni sewayini.

₁₆Ngenxa yezo zinto ndiyalila; iliso lam, iliso lam lihla amanzi,

Ngokuba ekude kum umthuthuzeli, umbuyisi womphefumlo wam;

Baziimpanza abantwana bam, ngokuba utshaba lwam lundoyisile.

₁₇IZiyon iyazolula izandla zayo, ayinamthuthuzeli;

UYehova ubawisele umthetho ngoYakobhi, ukuba ababandezeli bakhe bamngqonge;

IYerusalem iyinto elubhorha phakathi kwabo.

₁₈Úlilungisa uYehova; ngokuba bendiphikise umlomo wakhe.

Khanive, nonke zizwe, niwubone umvandedwa wam;

Umthinjana wam namadodana am emke nokuthinjwa.

₁₉Ndibizé izithandane zam, zandikhohlisa zona;

Ababingeleli bam, namadoda amakhulu akwam, aphume umphefumlo phakathi komzi,

Xa abezifunela ukudla, ukuba abuyise imiphefumlo yawo.

₂₀Khangela, Yehova, ngokuba ndibandezelekile; izibilini zam ziyabila;

Intliziyo yam iphendukile phakathi kwam; ngokuba ndasuka ndaba ziinkani kuphela;

Ngaphandle ikrele landihlutha abantwana, ngaphakathi kwakukufa kodwa.

₂₁Bandivile ukuba ndiyancwina; ndathi, Andinamthuthuzeli;

Zonke iintshaba zam zibuvile ububi bam; zinemihlali, ngokuba oko kwenziwé nguwe.

Ùyayizisa imini oyimemileyo, ziya kuba njengam ke.

₂₂Mabufike phambi kwakho bonke ububi bazo,

Uziphathe njengoko wandiphatha ngako ngenxa yezikreqo zam zonke;

Ngokuba kuninzi ukuncwina kwam, nentliziyo yam ityhafile.