IMIZEKELISO 14

₁Ubulumko bomfazi buyayakha indlu yakhe;

Ukumatha kuyayichitha ngezakhe izandla.

₂Uhamba ngokuthe tye owoyika uYehova;

Uthi gu bucala ngeendlela zakhe omdelayo.

₃Lusemlonyeni wesimathane uswazi lwekratshi;

Umlomo wezilumko uyazigcina.

₄Apho kungekho nkomo, umkhombe wesitali uba zé;

Indyebo eninzi iza ngamandla enkomo.

₅Ingqina elinyanisileyo aliwathethi amanga;

Ke lifutha amanga ingqina elixokayo.

₆Umgxeki ufuna ubulumko, angabuzuzi;

Ukwâzi kulula konengqondo.

₇Suka ebusweni bendoda esisinyabi;

Akuyi kuza wafumana mlomo wokwazi kuyo.

₈Ubulumko bonobuqili bukukuyiqonda indlela yakhe;

Ukumatha kwezinyabi yinkohliso.

₉Idini letyala liyazigxeka izimathane;

Phakathi kwabathe tye yimvisiswano.

₁₀Intliziyo iyabazi ubukrakra bayo ngokwayo;

Omnye umntu akanakuzingenisa eluvuyweni lwayo.

₁₁Indlu yabangendawo iyatshatyalaliswa;

Ke intente yabathe tye iyatyatyamba.

₁₂Kukho indlela ethe tye phambi komntu,

Ukanti ukuphela kwayo ziindlela zokufa.

₁₃Nasekuhlekeni intliziyo inomvandedwa;

Nokuphela kwalo uvuyo sisingqala.

₁₄Uhlútha ziindlela zakhe ontliziyo ishenxileyo;

Umntu olungileyo uhlútha zizenzo zakhe ngokwakhe.

₁₅Isiyatha sikholwa ngamazwi onke;

Onobuqili uyakuqónda ukunyathela kwakhe.

₁₆Isilumko siyoyika, sisuke entweni embi;

Isinyabi siphuphuma umsindo, sizithembile.

₁₇Ozekanekayo wenza ukumatha;

Indoda yamayelenqe ithiyekile.

₁₈Ilifa leziyatha kukumatha;

Abanobuqili banxiba isithsaba sokwazi.

₁₉Abenzi bobubi basibekeka phambi kwabalungileyo;

Abangendawo bema emasangweni amalungisa.

₂₀Ihlwempu lithiywa nangummelwane walo;

Ke bona abathanda isityebi baninzi.

₂₁Omdelayo ummelwane wakhe uyona;

Obabala abaziintsizana, hayi, uyolo lwakhe!

₂₂Àbayi kulahleka yini na abayila ububi?

Inceba nenyaniso iba nabayila okulungileyo.

₂₃Ekubulalekeni konke kubakho ungeniselo;

Ke ukuthetha komlomo kubanga ukuswela kodwa.

₂₄Busisithsaba sezilumko ubutyebi bazo;

Ukumatha kwezinyabi kukumatha.

₂₅Ingqina lenyaniso lihlangula imiphefumlo;

Ke elifutha amanga liyinkohliso.

₂₆Ekoyikeni uYehova kukho inkoloseko eliqele,

Abantwana bakhe baba nendawo yokuzímela.

₂₇Ukoyika uYehova lithende lobomi,

Ukuze kusukwe ezirhintyelweni zokufa.

₂₈Busebuninzini babantu ubungangamela bokumkani;

Kusekupheleni koluntu ukutshabalala kwesidwangube.

₂₉Ozeka kade umsindo unengqondo eninzi;

Ke yena ozekanekayo ucaphula ukumatha.

₃₀Bubomi benyama intliziyo epholileyo;

Ke lona ikhwele yimpehla emathanjeni.

₃₁Ocudisa isisweli ungcikiva uMenzi waso;

Olibabalayo ihlwempu uyamzukisa.

₃₂Ongendawo uyangqulwa bububi bakhe;

Ke ilungisa linehlathi ekufeni kwalo.

₃₃Entliziyweni yonengqondo buyaphumla ubulumko;

Ke embilinini wesinyabi buyazazisa.

₃₄Ubulungisa buyaluphakamisa uhlanga;

Isono lihlazo lezizwe.

₃₅Inkolelo yokumkani ikumkhonzi oqiqayo;

Ukuphuphuma kwakhe umsindo kukowenza okuziintloni.