IMIZEKELISO 20

₁Ingumgxeki iwayini,

singumxokozeli isiselo esinxilisayo;

Bonke abayotywe yiyo àbalumkile.

₂Ngumgqumo onjengowengonyama entsha umothuso wokumkani;

Omqumbisayo wona umphefumlo wakhe.

₃Kuluzuko endodeni ukuhlalela kude nengxabano;

Ke zona izimathane zonke ziyavungama.

₄Ebusika ivila alilimi;

Liyafuna ngexa lokuvuna, kungabikho nto.

₅Ngamanzi anzulu icebo entliziyweni yendoda,

Kanti indoda enengqondo iyalirhola.

₆Uninzi lwesintu luyayihlangabeza indoda enenceba kulo;

Ke yona indoda enyanisileyo, ngubani na ongáyifumanayo?

₇Ohamba ngengqibelelo yakhe elilungisa,

Hayi, uyolo loonyana bakhe emva kwakhe!

₈Ukumkani, ehleli esihlalweni sokugweba,

Uchithachitha ububi bonke ngamehlo akhe.

₉Ngubani na ongáthi, Ndiyiqaqambisile intliziyo yam,

Ndihlambulukile esonweni sam?

₁₀Amatye ngamatye,• iiefa ngee-efa,•

Ngamasikizi kuYehova ezo nto zombini.

₁₁Nenkwenkwe iyazazisisa ngeentlondi zayo,

Nokuba kuqaqambile na, nokuba kuthe tye na, ukwenza kwayo.

₁₂Indlebe evayo, neliso elibonayo,

UYehova uzenzile ezo zinto zombini.

₁₃Musa ukuthanda ubuthongo, hleze uhlwempuzeke;

Vula amehlo akho, uhluthe kukudla.

₁₄Imbi, imbi! utsho othengayo;

Emke, andule aqhayise.

₁₅Kukho igolide, neekorale• ezininzi;

Ke yona impahla enqabileyo ngumlomo onokwazi.

₁₆Thabatha ingubo yakhe omele omnye;

Menze isibambiso ngenxa yabasemzini.

₁₇Sinencasa endodeni isonka sobuxoki;

Ke emveni koko umlomo wayo uzala luhlalu.

₁₈Iingcinga zizinyaswa yingcebiswano;

Yilwa imfazwe unecebo elilungileyo.

₁₉Ohamba ehleba uhlakaza ucweyo;

Ungàdibani nepholopholo.

₂₀Otshabhisa uyise nonina,

Isibane sakhe sicima ebumnyameni phakathi.

₂₁Ilifa elizuzwe buphuthuphuthu ekuqaleni,

Ukuphela kwalo akunantsikelelo.

₂₂Musa ukuthi, Ndiya kubuphindezela ububi;

Thembela kuYehova, wókusindisa.

₂₃Ngamasikizi kuYehova amatye ngamatye;•

Nesikali• esikhohlisayo asilungile.

₂₄Kuvela kuYehova ukunyathela kwendoda;

Umntu angáthini na ukuyiqonda indlela yakhe?

₂₅Sisirhintyelo emntwini ukufumana athi, Ingcwele,

Aze aqale emva kwesibhambathiso, aphicothe.

₂₆Uchithachitha abangendawo ukumkani olumkileyo,

Aguqulele phezu kwabo umlenze wenqwelo.

₂₇Sisibane sikaYehova umphefumlo womntu,

Siphengulula zonke iingontsi zombilini.

₂₈Inceba nenyaniso ilondoloza ukumkani;

Uyixhasa itrone yakhe ngenceba.

₂₉Isihombo samadodana ngamandla awo;

Ubuhle bamadoda amakhulu zizimvi.

₃₀Imivumbo etyabulayo iguxa ububi;

Izibetho ziguxa iingontsi zombilini.