IMIZEKELISO 8

₁Abumemezi na ubulumko?

Nengqondo ayilikhuphi na ilizwi layo?

₂Emantloko eendawo eziphezulu ngasendleleni,

Ekuhlanganeni kweendlela, buzimisile.

₃Ngasemasangweni, ekuphumeni kuso isixeko,

Ekungeneni eminyango, buyamemelela, buthi:

₄Ndimemeza kuni, madoda;

Izwi lam ndilisingisa koonyana babantu.

₅Buqondeni ubuqili, ziyatha;

Yiqondeni intliziyo, zinyabi.

₆Yivani, kuba ndithetha izinto zobuhlalu,

Nokuvula imilebe yomlomo wam kuthe tye.

₇Ngokuba umlomo wam uxela inyaniso;

Okungendawo kulisikizi emilebeni yomlomo wam.

₈Yonke intetho yomlomo wam isebulungiseni;

Kuyo akukho kubhijeneyo nokujibilizayo.

₉Yonke iphela ithe gca konengqondo,

Ithe tye kwabafumene ukwazi.

₁₀Yamkelani uqeqesho lwam, ningamkeli silivere;

Yamkelani ukwazi ngaphezu kwegolide embiweyo, enyuliweyo.

₁₁Kuba ubulumko bulungile ngaphezu kwekorale,•

Neento zonke ezinqwenelwayo azilingani nabo.

₁₂Mna, bulumko, ndakhele ebuqilini;

Ndinokukufumana ukuyazi iminkqangiyelo.

₁₃Ukoyika uYehova kukuthiya into embi:

Ikratshi nokukratsha, nendlela embi,

Nomlomo onempenduka, ndiwuthiyile.

₁₄Likum icebo nozimaso;

Ndiyingqondo, bobam ubugorha.

₁₅Ookumkani banobukumkani ngam;

Nezidwangube zimisa ubulungisa ngam.

₁₆Bathethela ngam abathetheli,

Namanene, nabagwebi bonke behlabathi.

₁₇Abandithandayo ndiyabathanda nam;

Nabandifunayo kwakusasa bayandifumana.

₁₈Bunam ubutyebi nozuko,

Ubuncwane obusisimakade nobulungisa.

₁₉Silungile isiqhamo sam ngaphezu kwegolide embiweyo, nakwengcwengekileyo;

Lulungile ungeniselo lwam ngaphezu kwesilivere enyuliweyo.

₂₀Ndihamba ngomendo wobulungisa,

Phakathi kweendlela ezisesikweni;

₂₁Ukuze abandithandayo ndibadlise ilifa elililo,

Ndizizalise izindlu zabo zobuncwane.

₂₂UYehova wandivelisa ndaba yintlahlela yendlela yakhe,

Ndaba ngowamandulo emisebenzini yakhe yakudala.

₂₃Ndamiswa kwasephakadeni, kwasentloko,

Kwasemandulweni ehlabathi.

₂₄Ndazalwa kungekabikho manzi anzongonzongo,

Kungekabikho mithombo inzima ngamanzi.

₂₅Ndazalwa kungekafakwa ntaba,

Naphambi kweenduli;

₂₆Engekawenzi umhlaba namaphandle,

Nothuli lonke lwelimiweyo.

₂₇Ekulilungiseni kwakhe izulu, ndandikho apho;

Ekubuzungulezeni kwakhe ngomda ubuso bamanzi anzongonzongo;

₂₈Ekusiqiniseni kwakhe isibhakabhaka phezulu;

Ekugalelekeni kwemithombo yamanzi anzongonzongo;

₂₉Ekulumiseleni kwakhe ulwandle umda walo,

Ukuba amanzi angawugqithi umthetho wakhe;

Ekuzimiseni kwakhe iziseko zehlabathi:

₃₀Ndaye ndinaye, ndiyingcibi yomsebenzi,

Ndiziyolisa ngokwam iimini ngeemini;

Ndidlala phambi kwakhe ixesha lonke,

₃₁Ndidlala kwelimiweyo ihlabathi lakhe;

Nokuziyolisa kwam kukoonyana babantu.

₃₂Ke ngoko, bonyana, ndiveni;

Hayi, uyolo lwabazigcinayo iindlela zam!

₃₃Yivani uqeqesho, nibe nobulumko,

Ningaluyeki.

₃₄Hayi, utolo lomntu ondivayo,

Elinde ezingcangweni zam iimini ngeemini,

Egcine emigubasini yeminyango yam!

₃₅Kuba ofumana mna, ufumene ubomi;

Uzuzé okukholekileyo kuYehova.

₃₆Ophosana nam wona owakhe umphefumlo;

Bonke abandithiyayo bathanda ukufa.