IINDUMISO 103

₁Mbonge uYehova, mphefumlo wam,

Ilibonge igama lakhe elingcwele into yonke engaphakathi kwam.

₂Mbonge uYehova, mphefumlo wam,

Ungayilibali yonke impatho yakhe entle:

₃Uloxolela bonke ubugwenxa bakho;

Ulophilisa zonke izifo zakho;

₄Ulokhulula ubomi bakho esihogweni,

Akuthi jize ngenceba nemfesane;

₅Lo uwuzalisayo umlomo wakho ngento elungileyo,

Buhlaziyeke ubutsha bakho njengobokhozi.

₆NguYehova umenzi wemisebenzi yobulungisa,

Nezigwebo ngenxa yabacudisiweyo bonke;

₇Umazisi weendlela zakhe kuMoses,

Wezenzo zakhe ezincamisayo koonyana bakaSirayeli.

₈Unemfesane enobabalo uYehova,

Uzeka kade umsindo, mkhulu ngenceba.

₉Akaphiki kuphele,

Akawugcini umsindo ngonaphakade.

₁₀Akenzi kuthi ngokwezono zethu,

Akasiphathi ngokobugwenxa bethu;

₁₁Ngokuba injengokuphakama kwezulu phezu komhlaba,

Ukuba namandla, inceba yakhe kwabamoyikayo;

₁₂Kunjengokuba kude kwempumalanga entshonalanga,

Ukulukhwelelisa kwakhe kuthi ukreqo lwethu;

₁₃Kunjengokusikwa yimfesane koyise kubantwana,

Ukusikwa yimfesane kukaYehova kwabamoyikayo.

₁₄Ngokuba ùyakwazi yena ukubunjwa kwethu,

Ekhumbula ukuba siluthuli.

₁₅Hayi, umntu! Injengotyani imihla yakhe;

Njengentyantyambo yasendle, kunjalo ukutyatyamba kwakhe.

₁₆Xa uthe umoya wadlula kuyo, ayibikho,

Ingabi sazana nayo indawo yayo.

₁₇Ke yona inceba ka Yehova ikwabamoyikayo, kususela kwaphakade kude kuse ephakadeni,

Nobulungisa bakhe bukoonyana boonyana;

₁₈Kwabawugcinileyo umnqophiso wakhe,

Kwabazikhumbulayo iziyalezo zakhe ukuba bazenze.

₁₉UYehova uyizinzisile emazulwini itrone yakhe,

Ubukumkani bakhe bulawula into yonke.

₂₀Mbongeni uYehova, nina zithunywa zakhe,

Magorha omeleleyo, alenzayo ilizwi lakhe,

Ephulaphula isandi selizwi lakhe.

₂₁Mbongeni uYehova, nonke mikhosi yakhe,

Balungiseleli bakhe, benzi bokuthanda kwakhe.

₂₂Mbongeni uYehova, nonke zenzo zakhe,

Ezindaweni zonke zobukumkani bakhe.

Mbonge uYehova, mphefumlo wam.