IINDUMISO 105

₁Bulelani kuYehova, nqulani igama lakhe;

Yazisani ezizweni izenzo zakhe ezincamisileyo.

₂Vumani kuye, mbetheleni uhadi;

Xoxani ngemisebenzi yakhe yonke ebalulekileyo.

₃Qhayisani ngegama lakhe elingcwele;

Mayivuye intliziyo yabamquqelayo uYehova.

₄Ngxamelani uYehova namandla akhe;

Funani ubuso bakhe ngamaxesha onke.

₅Khumbulani imisebenzi yakhe ebalulekileyo awayenzayo,

Izimanga zakhe, nezigwebo zomlomo wakhe,

₆Mbewu ka-Abraham, yomkhonzi wakhe,

Nyana bakaYakobi, banyulwa bakhe.

₇NguYehova uThixo wethu yena;

Zisehlabathini lonke izigwebo zakhe.

₈Úwukhumbula ngonaphakade umnqophiso wakhe,

Ilizwi awalimisela iwaka lezizukulwana;

₉Awanqophisana ngalo noAbraham,

Awalifungela uIsake;

₁₀Awalimisayo ukuba libe ngummiselo kuYakobi,

Libe ngumnqophiso ongunaphakade kuSirayeli;

₁₁Esithi, Ndikunika ilizwe lakwaKanan,

Libe licandelo lelifa lenu;

₁₂Besengamadoda ambalwa,

Bebancinane, bengabaphambukeli kulo.

₁₃Babehamba besuka kolunye uhlanga, baye kolunye uhlanga,

Besuka kobunye ubukumkani, baye kwabanye abantu.

₁₄Akavumelanga mntu ukuba abacudise,

Wohlwaya ookumkani ngenxa yabo;

₁₅Esithi, Musani ukubachukumisa abathanjiswa bam,

Musani ukubaphatha kakubi abaprofeti bam.

₁₆Wabiza indlala, yeza phezu kwelizwe,

Wawaphula wonke umsimelelo osisonka.

₁₇Wathuma indoda phambi kwabo;

Kwathengiswa ngoYosefu, waba likhoboka.

₁₈Bazicinezela iinyawo zakhe ngamakhmandela,

Wafika umphefumlo wakhe esinyithini;

₁₉Kwada kwalixesha lokufika kwelizwi lakhe,

Intetho kaYehova yamnyibilikisa.

₂₀Ukumkani wathuma, wamkhulula,

Umlawuli wezizwe wamvulela;

₂₁Wamenza inkosi yendlu yakhe,

Umlawuli wemfuyo yakhe yonke,

₂₂Ukuba abakhonkxe abathetheli bakhe ngokuzithandela kwakhe,

Amadoda akhe amakhulu awafùndise ubulumko.

₂₃Waza uSirayeli waya eYiputa,

UYakobi waphambukela ezweni lakwaHam.

₂₄Wabaqhamisa kakhulu abantu bakhe,

Wabomeleza ngaphezu kwababandezeli babo.

₂₅Wazijika iintliziyo zabo, ukuba babathiye abantu bakhe,

Babaqhathanisele abakhonzi bakhe.

₂₆Wathuma uMoses, umkhonzi wakhe,

NoAron awamnyulayo.

₂₇Bazenza kubo iindawo zemiqondiso yakhe,

Nezimanga zakhe ezweni lakwaHam.

₂₈Wathumela ubumnyama, kwaba mnyama;

Ababa nakuwaphikisa amazwi akhe.

₂₉Wawaguqula amanzi abo, aba ligazi,

Wazibulala iintlanzi zabo.

₃₀Ilizwe labo lanyakazela amasele

Ezingontsini zookumkani babo.

₃₁Wathetha, zafika izibawu,

Iingcongconi, emideni yabo yonke.

₃₂Wabanika isichotho, saba yimvula;

Umlilo walenya ezweni labo.

₃₃Wayibetha imidiliya yabo nemikhiwane yabo,

Wayishwaqa imithi yemida yabo.

₃₄Wathetha, kwafika iinkumbi ezandayo,

Nezikhothululayo, into engenakubalwa;

₃₅Zayidla imifuno yonke ezweni labo,

Zazidla iziqhamo zomhlaba wabo.

₃₆Waza wababulala bonke abamazibulo ezweni labo,

Intlahlela yamandla abo onke.

₃₇Wabakhupha ke abakhe benesilivere negolide,

Akwabakho ukhubekayo ezizweni zakhe.

₃₈Lavuya iYiputa ekuphumeni kwabo,

Ngokuba lifikelwe kukunkwantyisa kwabo.

₃₉Waneka ilifu lokubasitha,

Nomlilo wokukhanyisa ebusuku.

₄₀Babiza, wazisa izagwityi,

Wabahluthisa nangesonka sasezulwini.

₄₁Wavula iliwa, abaleka amanzi,

Ahamba engumlambo emqwebedwini.

₄₂Ngokuba wakhumbula ilizwi lakhe elingcwele,

Wakhumbula uAbraham umkhonzi wakhe.

₄₃Wabakhupha abantu bakhe benemihlali,

Abanyulwa bakhe bememelela.

₄₄Wabanika amazwe eentlanga,

Bayihlutha inzuzo yokwaphuka kwezizwe,

₄₅Ukuze bayigcine imimiselo yakhe,

Bayibambe imiyalelo yakhe.

Haleluya!