IINDUMISO 116

₁Ndiyamthanda, ngokuba uYehova eliva

Ilizwi lam, ukutarhuzisa kwam.

₂Ngokuba endithobele indlebe yakhe,

Ndiya kumnqula ngemihla yam yonke.

₃Izintya zokufa zandijikela,

Iingxingongo zelabafileyo zandifumana,

Ndafunyanwa ziimbandezelo nesingqala.

₄Ndanqula ke igama likaYehova, ndathi,

Yehova, ndiya kukhunga, siza umphefumlo wam.

₅UYehova unobabalo, ulilungisa,

UThixo wethu unemfesane.

₆Ngumgcini wabazizidenge uYehova;

Ndandiswele, wandisindisa.

₇Buyela ekuphumleni kwakho, mphefumlo wam,

Ngokuba uYehova ukuphatha kakuhle;

₈Ngokuba ewuhlangule umphefumlo wam ekufeni,

Iliso lam ezinyembezini,

Unyawo lwam ekungqulekeni.

₉Ndiya kuhamba-hamba phambi koYehova

Emazweni abaphilileyo.

₁₀Ndiyakholwa, xa ndithethayo;

Mna ndicinezelekile kunene.

₁₁Ndathi mna ekuphakuzeleni kwam,

Bonke abantu ngamaxoki.

₁₂Ndingámbuyisela ngantoni na uYehova

Konke ukundiphatha kwakhe kakuhle?

₁₃Ndophakamisa indebe yosindiso,

Ndinqule igama likaYehova.

₁₄Ewe, ndozizalisa izibhambathiso zam kuYehova,

Phambi kwabantu bakhe bonke kalokunje.

₁₅Kunqabile emehlweni kaYehova

Ukufa kwakbakhe benceba.

₁₆Okunene, Yehova, ndingumkhonzi wakho,

Ndingumkhonzi wakho, unyana womkhonzazana wakho;

Ùzicombulule iimbophelelo zam.

₁₇Ndiya kubingelela kuwe umbingelelo wombulelo,

Ndinqule igama likaYehova.

₁₈Ewe, ndiya kuzizalisa izibhambathiso zam kuYehova,

Phambi kwabantu bakhe bonke,

₁₉Ezintendelezweni zendlu kaYehova,

Esazulwini sakho, Yerusalem.

Haleluya!