IINDUMISO 118

₁Bulelani kuYehova, ngokuba elungile,

Ngokuba ingunaphakade inceba yakhe.

₂Makathi uSirayeli,

Ingunaphakade inceba yakhe.

₃Mayithi indlu ka-Aron,

Ingunaphakade inceba yakhe.

₄Mabathi abamoyikayo uYehova,

Ingunaphakade inceba yakhe.

₅Ndabiza uYehova ndisengxingongweni;

Wandiphendula uYehova, wandibeka endaweni ebanzi.

₆UYehova ungakum, andoyiki;

Angándenza ntoni na umntu?

₇UYehova ungakum ngokundinceda;

Ndiya kubona mna kwabandithiyayo.

₈Kulungile ukuzímela ngoYehova,

Ngaphezu kokukholosa ngomntu.

₉Kulungile ukuzímela ngoYehova

Ngaphezu kokukholosa ngamanene.

₁₀Zingafanelana zonke iintlanga zindirhawule:

Egameni likaYehova inene ndozinqumla.

₁₁Zingafanelana zindirhawule zandirhawula:

Egameni likaYehova inene ndozinqumla.

₁₂Zingafanelana zindirhawule njengeenyosi:

Zocinywa njengomlilo weentsasa;

Egameni likaYehova inene ndozinqumla.

₁₃Ùndityhale ngamandla wena ukuba ndiwe;

Kodwa uYehova wandinceda.

₁₄Iqhayiya lam nengoma yam nguYehova,

Waba lusindiso kum.

₁₅Izwi lokumemelela nelosindiso lisezintenteni zamalungisa, lisithi,

Isandla sokunene sikaYehova siyeyisa;

₁₆Isandla sokunene sikaYehova siphakamile;

Isandla sokunene sikaYehova siyeyisa.

₁₇Andiyi kufa, ndiya kudla ubomi,

Ndibalise ngezenzo zikaYehova.

₁₈UYehova undithethisé kakhulu,

Ke akandinikela ekufeni.

₁₉Ndivuleleni amasango obulungisa;

Ndiya kungena ngawo, ndiya kubulela kuYehova.

₂₀Nali isango likaYehova,

Amalungisa angena ngalo.

₂₁Ndiyabulela kuwe kuba undiphendule,

Waba lusindiso kum.

₂₂Ilitye abalilahláyo abakhi

Laba yintloko yembombo.

₂₃Kuvele kuYehova oku,

Kungumsebenzi obalulekileyo emehlweni ethu.

₂₄Le yimini ayenzileyo uYehova,

Masigcobe sivuye ngayo.

₂₅Yehova, camagu, khawusindise,

Yehova, camagu, khawuhlangule.

₂₆Makabongwe lo uzayo esegameni likaYehova,

Siyanisikelela nina basendlwini kaYehova.

₂₇UYehova nguThixo, úsikhanyisela;

Bophelelani umbingelelo womthendeleko ngeentambo,

Kude kuye ezimpondweni zesibingelelo.

₂₈ÙnguThixo wam, ndiya kubulela kuwe;

ÙnguThixo wam, ndiya kukuphakamisa.

₂₉Bulelani kuYehova, ngokuba elungile,

Ngokuba ingunaphakade inceba yakhe.