IINDUMISO 140

₁Ndíhlangule, Yehova, esintwini esinobubi,

Ndílondoloze emntwini ogonyamelayo,

₂Abacinga okubi entliziyweni.

Imihla yonke baxhaya imfazwe.

₃Balola ulwimi lwabo njengenyoka;

Ubuhlungu berhamba busemlonyeni wabo. (Phakamisani.)

₄Ndígcine, Yehova, ezandleni zongendawo,

Ndílondoloze emntwini ogonyamelayo,

Abacinga ukuzikhubekisa iinyawo zam.

₅Abanekratshi bandiqhushekéle isibatha nezintya,

Baneké umnatha ecaleni kwendlela,

Bandithiyéle ngemigibe. (Phakamisani.)

₆Ndithi kuYehova, ÙnguThixo wam;

Beka indlebe, Yehova, elizwini lesikhungo sam.

₇Yehova, Nkosi yam, nqaba endisindisayo,

Ùyigqubuthèle intloko yam ngemini yeduli.

₈Musa ukumnika, Yehova, ongendawo iminqweno yakhe;

Musa ukuwuphumelelisa umnkqangiyelo wakhe,

Hleze aziphakamise. (Phakamisani.)

₉Yona intloko yabandingqingayo,

Ububi bomlomo wabo mabubagubungele.

₁₀Mabathotyelwe amalahle avuthayo;

Makabawise emlilweni, emimbithini, bangabi saphuma.

₁₁Indoda enolwimi mayingazinzi ehlabathini;

Indoda enokugonyamela, ububi mabuyizingele ngembembetshane.

₁₂Ndiyazi ukuba uYehova uya kulifeza

Ityala losizana, ibango lamahlwempu.

₁₃Inene, amalungisa aya kubulela kwigama lakho;

Baya kuhlala ebusweni bakho abathe tye.