IINDUMISO 145

₁Ndiya kukuphakamisa, Thixo wam, wena Kumkani,

Ndilibonge igama lakho ngonaphakade kanaphakade.

₂Imihla yonke ndiya kukubonga,

Ndilidumise igama lakho ngonaphakade kanaphakade.

₃Mkhulu uYehova, ngowokudunyiswa kakhulu;

Ubukhulu bakhe abunakugocwagocwa.

₄Izizukulwana ngezizukulwana, kunconywa izenzo zakho,

Kuxelwe ubugorha bakho.

₅Bunobungangamela ubuqaqawuli bendili yakho;

Ngeendawo zakho ezibalulekileyo ndiya kucamngca.

₆Bothetha ngamandla ezenzo zakho ezoyikekayo,

Ndibalìse ngobukhulu bakho.

₇Bompompoza isikhumbuzo sokulunga kwakho okukhulu,

Bamemelele ngobulungisa bakho.

₈Únobabalo nemfesane uYehova,

Uzeka kade umsindo, mkhulu ngenceba.

₉Ulungile uYehova kubo bonke,

Imfesane yakhe ikuzo zonke izenzo zakhe.

₁₀Ziyabulela kuwe, Yehova, zonke izenzo zakho,

Bakubonge abákho benceba;

₁₁Uzuko lobukumkani bakho balutsho,

Bathethe ngobugorha bakho.

₁₂Ukuba babazise oonyana babantu ubugorha bakhe,

Ubuqaqawuli obuhle bobukumkani bakhe.

₁₃Ubukumkani bakho bubukumkani bamaphakade onke,

Nolawulo lwakho lukwizizukulwana ngezizukulwana.

₁₄UYehova ungumxhasi wabo bonke abawayo,

Ngumphakamisi wabo bonke abagobileyo.

₁₅Amehlo eento zonke akhangele kuwe,

Wena ke uzinika ukudla kwazo ngexesha elililo;

₁₆Ùyasivula isandla sakho,

Uzihluthise iinto zonke eziphilileyo ngeento ezikholekileyo.

₁₇Úlilungisa uYehova ngeendlela zakhe zonke,

Unenceba ngezenzo zakhe zonke.

₁₈Usondele uYehova kubo bonke abamnqulayo,

Kubo bonke abamnqulayo ngenyaniso.

₁₉Úyayenza into ekholekileyo kwabamoyikayo,

Akuve ukuzibika kwabo, abasindise.

₂₀UYehova ungumgcini wabo bonke abamthandayo,

Abatshabalàlise bonke abangendawo.

₂₁Umlomo wam mawuthethe indumiso kaYehova,

Inyama yonke ilibonge igama lakhe elingcwele ngonaphakade kanaphakade.