IINDUMISO 147

₁Haleluya!

Ngokuba kulungile ukuvuma ngoThixo wethu;

Ngokuba kumnandi, ifanelekile indumiso.

₂Umakhi weYerusalem nguYehova;

Abagxothwa bakwaSirayeli ubabuthela khona.

₃Ulophilisa abaphuke intliziyo,

Abophe amanxeba abo;

₄Ulobala inani leenkwenkwezi,

Ezibiza zonke ngamagama.

₅Inkulu iNkosi yethu, inamandla amakhulu;

Ingqondo yayo ayiphele ndawo.

₆Ulophakamisa abalulamileyo nguYehova,

Uthobela abangendawo emhlabeni.

₇Hlabelani kuYehova eyokubulela,

Mbetheleni uhadi uThixo wethu.

₈Ulosibekelisa izulu ngamafu,

Ulolungisela umhlaba imvula;

Ulontshulisa utyani ezintabeni;

₉Ulonika inkomo ukudla,

Namathole ehlungulu alilayo.

₁₀Akabunanze nganto ubugorha behashe,

Akakholiswa zizitho zendoda;

₁₁UYehova ukholiswa ngabamoyikayo,

Abalindé inceba yakhe.

₁₂Mncome uYehova, Yerusalem.

Mdumise uThixo wakho, Ziyon:

₁₃Ngokuba eyomelezile imivalo yamasango akho,

Ebasikelele abantwana bakho phakathi kwakho.

₁₄Ngulomisa uxolo emideni yakho,

Wakuhluthisa ngengqolowa etyebileyo.

₁₅Ulothumela intetho yakhe ehlabathini,

Ilizwi lakhe ligidima ngokukhawuleza;

₁₆Ulonika ikhephu njengoboya bezimvu,

Ugcwayela iqabaka njengothuthu,

₁₇Ephosa umkhenkce wakhe njengamaqhekeza;

Ngubani na onokuma phambi kwengqele yakhe?

₁₈Uthumela ilizwi lakhe, ezo nto azinyibilikise;

Uvuthuzisa umoya wakhe, aqukuqele amanzi.

₁₉Uloxelela uYakobi ilizwi lakhe,

USirayeli imimiselo yakhe namasiko akhe.

₂₀Àkenjanga ngalo kolunye uhlanga,

Namasiko àluwazi.

Haleluya!