Umbulelo ngenxa yoloyiso
Kumongameli. Umhobe kaDavide.
1Yehova, úvuyile ngamandla akho ukumkani,
Asikuko nokuba úyacoba ngosindiso lwakho!
2Ùmniké umnqweno wentliziyo yakhe,
Akwasilandula isicelo somlomo wakhe. (Phakamisani.)
3Ngokuba umkhawulela ngeentsikelelo zokulungileyo,
Umthwesa isithsaba segolide engcwengekileyo.
4Wacela ubomi kuwe, wampha,
Wamnika imihla emide ngonaphakade kanaphakade.
5Lukhulu uzuko lwakhe ngosindiso lwakho;
Ùbeka phezu kwakhe indili nobungangamela.
6Ngokuba umenze waba yintsikelelo ngonaphakade,
Ùmvuyisa ngovuyo ebusweni bakho.
7Ngokuba ukumkani ukholose ngoYehova,
Ngenceba yOsenyangweni akayi kushukunyiswa.
8Isandla sakho siya kuzifumana zonke iintshaba zakho,
Esokunene sakho siya kubafumana abakuthiyayo.
9Ùya kubenza babe njengeziko lomlilo, wakubonakala.
UYehova uya kubaginya ngomsindo wakhe,
Nomlilo ubadle.
10Ùya kusitshabalalisa isiqhamo sabo emhlabeni,
Imbewu yabo koonyana babantu.
11Ngokuba bakuthobela ububi,
Bacinga iyelenqe; àbayi kufeza nto.
12Ngokuba ùya kubenza bakunikele umhlana;
Ngesaphetha sakho uya kuxuna iintolo zakho ebusweni babo.
13Phakama, Yehova, ngamandla akho;
Siya kuvuma sibethe uhadi ngobugorha bakho.
