IINDUMISO 34

₁Ndiya kumbonga uYehova ngamaxesha onke,

Ihlale isemlonyeni wam indumiso yakhe.

₂Úya kuqhayisa umphefumlo wam ngoYehova;

Bova abalulamileyo, bavuye.

₃Menzeni mkhulu kunye nam uYehova,

Siliphakamise kunye igama lakhe.

₄Ndamfuna uYehova, wandiphendula;

Wandihlangula kwiinto zonke endinxunguphala zizo.

₅Babheka kuye, bakhazimla;

Ubuso babo àbaba nazintloni.

₆Usizana lwadanduluka, weva uYehova,

Walusindisa ezimbandezelweni zalo zonke.

₇Isithunywa sikaYehova sibangqinga ngeenxa zonke abamoyikayo,

Sibahlangule.

₈Yivani, nibone ukuba ulungile uYehova.

Hayi, uyolo lomfo ozímela ngaye!

₉Moyikeni uYehova, nina bangcwele bakhe,

Ngokuba abanakuswela abamoyikayo.

₁₀Iingonyama ezintsha ziyaswela, zilambe;

Ke bona abamfunayo uYehova abasweli nanye into elungileyo.

₁₁Yizani, bonyana, phulaphulani kum;

Ndonifundisa ukoyika uYehova.

₁₂Ngubani na umntu obungxameleyo ubomi,

Othanda imihla yokubona okulungileyo?

₁₃Gcina ulwimi lwakho ebubini,

Umlomo wakho ungathethi nkohliso.

₁₄Suka ebubini, wenze okulungileyo;

Funa uxolo, uluphuthume.

₁₅Amehlo kaYehova akumalungisa,

Iindlebe zakhe zisekuzibikeni kwawo.

₁₆Ubuso bukaYehova bujonge abenzi bokubi,

Ukuba akunqumle ehlabathini ukukhunjulwa kwabo.

₁₇Akhala, weva uYehova;

Wawahlangula ezimbandezelweni zawo zonke.

₁₈Ùsondele uYehova kwabantliziyo zaphukileyo,

Àbasindise abamoya utyumkileyo.

₁₉Buninzi ububi obulihlelayo ilungisa,

Ke uYehova ulihlangula kubo bonke.

₂₀Ùyawagcina onke amathambo alo,

Akwaphuki nalinye kuwo.

₂₁Ububi buyambulala ongendawo;

Abathiyi belungisa bayalithwala ityala.

₂₂UYehova uyawukhulula umphefumlo wabakhonzi bakhe,

Bangàthwali tyala bonke abazimela ngaye.