IINDUMISO 37

₁Musa ukuzivuthisa ngomsindo ngabenzi bobubi;

Musa ukubamonela abenzi bobugqwetha.

₂Ngokuba baya kusikwa kamsinyane njengengca,

Babune njengohlaza oluphumayo.

₃Kholosa ngoYehova, wenze okulungileyo;

Limé ilizwe, ulandelane nokuthembeka.

₄Ziyolise ngoYehova;

Wókunika okunqwenelwa yintliziyo yakho.

₅Yiyekele kuYehova indlela yakho,

Ukholose ngaye; wókwenzela,

₆Abuvelise njengokukhanya ubulungisa bakho,

Nebango lakho njengemini enkulu.

₇Yithi cwaka kuYehova, ulindele kuye;

Musa ukuzivuthisa ngomsindo ngonempumelelo ngendlela yakhe,

Ngomntu ofeza amayelenqe.

₈Lahla umsindo, ushiye ubushushu;

Musa ukuzivuthisa ngomsindo, kuba oko kusingisa ekwenzeni ububi kuphela.

₉Ngokuba abenzi bobubi baya kunqunyulwa;

Ke bona abamthembayo uYehova, baya kulidla ilifa ilizwe.

₁₀Kusaya kuba mzuzwana, angabikho ongendawo;

Ùthi wakuyikhangela indawo yakhe, angabikho.

₁₁Ke bona abalulamileyo baya kulidla ilifa ilizwe,

Baziyolise ngobuninzi boxolo.

₁₂Ongendawo ulenzela amayelenqe ilungisa,

Ulitshixizela amazinyo akhe.

₁₃INkosi iyamhleka,

Ngokuba ibona ukuba iyeza imini yakhe.

₁₄Barholé ikrele abangendawo, bagobé isaphetha sabo,

Ukuba bawise usizana nehlwempu,

Basike abandlela zithe tye.

₁₅Ikrele labo liya kungena kwakweyabo intliziyo,

Zaphuke izaphetha zabo.

₁₆Ilungile intwana elinayo ilungisa,

Kunentabalala abanayo abangendawo abaninzi:

₁₇Ngokuba iingalo zabangendawo ziya kwaphulwa;

NguYehova umxhasi wamalungisa.

₁₈NguYehova umazi wemihla yabagqibeleleyo,

Nelifa labo liya kuba ngunaphakade.

₁₉Àbayi kudana ngexesha lobubi;

Baya kuhlutha ngeemini zendlala:

₂₀Ngokuba abangendawo bayatshabalala;

Iintshaba zikaYehova zinjengobuhle bamadlelo;

Ziya kuphela njengomsi, ziphele.

₂₁Úyaboleka ongendawo, angabuyisi;

Ke lona ilungisa liyababala, liphe.

₂₂Ngokuba abasikelelweyo nguye baya kulidla ilifa ilizwe,

Banqanyulwe abatshabhisiweyo nguye.

₂₃Amanyathela omfo aqiniswa nguYehova,

Ayithande indlela yakhe.

₂₄Ewíle, akayi kuqungquluza,

Ngokuba nguYehova umxhasi wesandla sakhe.

₂₅Ndaka ndamtsha, kungokunje ndimdala;

Ukanti andizanga ndilibone ilungisa lishiywa,

Nembewu yalo ivukela ukutya.

₂₆Imihla yonke liyababala, liboleke abanye;

Nembewu yalo iyintsikelelo.

₂₇Suka ebubini, wenze okulungileyo,

Uhlale ngonaphakade.

₂₈Ngokuba uYehova uthanda okusesikweni,

Angabashiyi abenceba bakhe;

Bagciniwe ngonaphakade:

Ke yona imbewu yongendawo iyanqanyulwa.

₂₉Amalungisa aya kulidla ilifa ilizwe,

Ahlale kulo ngonaphakade.

₃₀Umlomo welungisa uxela ubulumko,

Nolwimi lwalo luthetha okusesikweni.

₃₁Umyalelo woThixo walo usentliziyweni yalo;

Akayi kuhexa amanyathela alo.

₃₂Ongendawo uyalilalela ilungisa,

Ufuna ukulibulala.

₃₃UYehova akalinikeli esandleni sakhe,

Angàligwebi ekuthethweni kwetyala lalo.

₃₄Thembela kuYehova, ugcine indlela yakhe;

Wokuphakamisa, ulidle ilifa ilizwe;

Ekunqanyulweni kongendawo wobonela.

₃₅Ndimbonile ongendawo, oyingqwangangqwili,

Exanda njengomthi omilileyo, uluhlaza;

₃₆Kwadlula umntu, nanko engasekho; Ndamfuna, akafumaneka.

₃₇Gcina ogqibeleleyo, ukhangele othe tye;

Ngokuba izivela-mva zezomntu woxolo.

₃₈Ke bona abangendawo batshatyalaliswa kuphele;

Izivela-mva zongendawo ziyanqanyulwa.

₃₉Usindiso lwamalungisa luphuma kuYehova;

Uligwiba lawo ngexesha lembandezelo.

₄₀UYehova uyawanceda, awasindise,

Awasindise kongendawo, awasindise,

Ngokuba azímela ngaye.