IINDUMISO 42

₁Njengexhama elitsalela emifuleni yamanzi,

Wenjenjalo ukutsalela kuwe, Thixo, umphefumlo wam.

₂Umphefumlo wam unxanela uThixo, uThixo ophilileyo;

Ndiya kufika nini na, ndibonakale ebusweni bukaThixo?

₃Iinyembezi zam zaba kukudla kwam imini nobusuku,

Bakuthi kum imihla yonke, Úphi na uThixo wakho?

₄Ndikhumbula oku, ndiwuphalazela kum umphefumlo wam,

Ukuhamba kwam nezihlwele ndisiya endlwini kaThixo,

Sinezwi lokumemelela nokubulela, siyingxokolo evuyayo.

₅Kungani na ukuba ùsibekeke, mphefumlo wam;

Kungani na ukuba ugule ngaphakathi kwam?

Lindela kuThixo, ngokuba ndisaya kubuya ndibulele kuye,

Olusindiso lobuso bam, noThixo wam.

₆Thixo wam, umphefumlo wam usibekekile kum; ngenxa yoko ndikhumbula wena

Ezweni laseYordan, nakweleHermon, entabeni yeMitsare.

₇Amanzi anzongonzongo abiza amanzi anzongonzongo ngesandi seengxangxasi zakho;

Onke amaza akho alwayo, amaza akho agugumayo, adlule phezu kwam.

₈Emini uYehova uya kuyiwisela umthetho inceba yakhe,

Nasebusuku ukuvuma ngaye kunam,

Ukuthandaza kuThixo wobomi bam.

₉Ndithi ke kuThixo oyingxondorha yam, Undilibele ngani na?

Ndihambelani na ngezimnyama zokuzila ngokuxina kotshaba?

₁₀Ngento ephehlayo emathanjeni am, bayandingcikiva abandibandezelayo,

Ngokuthi kwabo kum imihla yonke, Úphi na uThixo wakho?

₁₁Kungani na ukuba ùsibekeke, mphefumlo wam;

Kungani na ukuba ugule ngaphakathi kwam?

Lindela kuThixo, ngokuba ndisaya kubuya ndibulele kuye,

Olusindiso lobuso bam, noThixo wam.