IINDUMISO 58

₁Yinene na kodwa ukuba nithetha ubulungisa, nina bothixo?

Nigweba oonyana babantu ngokuthe tye?

₂Hayi, entliziyweni nenza ngobugqwetha;

Ezweni nilinganisela ukugonyamela kwezandla zenu.

₃Abangendawo baphambukile kwasesizalweni;

Bandwendwile kwasesiswini abathethi bamanga.

₄Banobuhlungu obunjengobuhlungu benyoka,

Njengephimpi elizenza isithulu, elivingca indlebe yalo;

₅Ukuze lingaliva izwi labanyangi,

Lababopha ngomabophe, beziingcibi.

₆Thixo, yaphula amazinyo abo emlonyeni wabo;

Amabamba eengonyama ezintsha wavithe, Yehova.

₇Mabaphalale njengamanzi equkuqela;

Akuxuna iintolo zakhe, mazinge zicutshiwe.

₈Mababe njengenkumba ehamba inyibilika,

Njengemva-mbilini yomfazi, engalibonanga ilanga.

₉Zingekaziva iintsasa iimbiza zenu,

Nokuba ikrwada inyama, nokuba iza kuvuthwa, úyayiqweqwedisa.

₁₀Liya kuvuya ilungisa, lakuyibona impindezelo;

Liya kuzihlamba iinyawo zalo egazini longendawo,

₁₁Athi umntu, Inene, ilungisa linesiqhamo;

Inene, úkho uThixo ogwebayo ehlabathini.