IINDUMISO 68

₁Makasuk' eme uThixo, zibe ziintsali iintshaba zakhe,

Basabe ebusweni bakhe abamthiyayo.

₂Njengokuphetshethwa komsi, báphephethe;

Njengokunyibilika komthwebeba phambi komlilo,

Mabadake ngokunjalo abangendawo ebusweni bukaThixo.

₃Ke wona amalungisa makavuye, adlamke phambi koThixo,

Abe nemihlali, enemivuyo.

₄Vumani kuThixo, libetheleni uhadi igama lakhe;

Menzeleni umendo ophakamileyo, ulokhwela ecanda ezinkqantosini,

Ogama lakhe linguYehova; nidlamke phambi kwakhe.

₅Uyise weenkedama, umthetheleli wabahlolokazi,

NguThixo ekhayeni lakhe elingcwele.

₆UThixo nguhlalisa endlwini ababebodwa,

Ngukhuphela enywebeni ababanjiweyo;

Ngabaziinjubaqa bodwa abahlala kwelibalelelweyo.

₇Thixo, ekuphumeni kwakho úphambi kwabantu bakho,

Ekunyatheleni kwakho enkangala, (Phakamisani.)

₈Lanyikima ihlabathi,

Lavuza izulu ebusweni bukaThixo,

ISinayi leya ebusweni bukaThixo, uThixo kaSirayeli.

₉Walitshiza ngemvula eninzi yesisa sakho, Thixo, ilifa lakho;

Lakùbharha, walizimasa wena.

₁₀Wahlala khona umhlambi wakho,

Wamlungisela olusizana ngokulunga kwakho, Thixo.

₁₁INkosi iya kukhupha izwi elinamandla,

Ube mkhulu umkhosi weentokazi ezishumayela iindaba ezilungileyo.

₁₂Ookumkani bemikhosi baya kusaba besabile;

Intokazi esele ekhaya iya kuwaba amaxhoba.

₁₃Nakulala phantsi phakathi kweentlanti,

Noxelisa amaphiko evukuthu alekwe ngesilivere,

Neentsiba zalo ezalekwe ngegolide ebengezelayo.

₁₄Ekubadubadubeni kukaSomandla ookumkani kulo,

Koba mhlophe ngowekhephu eTsalimon.

₁₅Yintaba kaThixo intaba yaseBhashan,

Yintaba encopho zininzi intaba yaseBhashan.

₁₆Niyigxeleshelani na, zintaba zincopho zininzi,

Intaba ayinqweneleyo uThixo ukuba ahlale kuyo?

Ewe, uYehova uya kuhlala kuyo ngonaphakade.

₁₇Iinqwelo zokulwa zikaThixo zizigidi, ngamawaka-waka;

INkosi ikuzo; yiSinayi ebungcweleni,

₁₈Ùnyuké waya phezulu, ùthimbe abathinjwa,

Ùthabathe izipho phakathi kwabantu,

Naphakathi kwabaziinjubaqa, ukuba ahlale uYehova uThixo khona.

₁₉Mayibongwe iNkosi;

Ithwala imithwalo yethu imihla ngemihla;

NguThixo umsindisi wethu. (Phakamisani.)

₂₀Yena uThixo kuthi nguThixo wosindiso,

Kokuka Yehova, iNkosi yethu, ukukhupha ekufeni.

₂₁Kodwa uThixo uya kuyiphalusa intloko yeentshaba zakhe,

Nentloko enesihlwitha yohambayo kwizigqitho zakhe.

₂₂Yathi iNkosi, Ndiya kuzibuyisa eBhashan,

Ndiya kuzibuyisa iintshaba zakho ezinzulwini zolwandle;

₂₃Ukuze uziphaluse, unyawo lwakho lusegazini,

Nolwimi lwezinja zakho lube nesabelo salo ezintshabeni.

₂₄Bakúbona ukunyathela kwakho, Thixo,

Ukunyathela koThixo wam, koKumkani wam, esebungcweleni.

₂₅Phambili ziimvumi, ngasemva ngababethi bohadi,

Emacaleni ziintombi ezibetha iingqongqo.

₂₆Emabandleni bongani uThixo,

INkosi, nina basemthonjeni wakwaSirayeli.

₂₇Balapho ooBhenjamin, inci yabo, umphathi wabo,

Abathetheli bakwaYuda, ihlokondiba labo;

Abathetheli bakwaZebhulon, abathetheli bakwaNafetali.

₂₈UThixo wakho wakuwisela umthetho wokuba uqine;

Kuqinise, Thixo, oko usenzeleyo.

₂₉Bevela etempileni yakho eyongamele iYerusalem,

Ookumkani mabeze nezithabathaba kuwe.

₃₀Khalimela amarhamncwa asengcongolweni,

Umhlambi weenkunzi eziziimbalasane, kunye namathole ezizwe,

Ukuze baziwise benezijungqe zesilivere.

Wazibhangisa izizwe eziyithandayo imfazwe.

₃₁Kovela amanono eYiputa;

UKushi wozolulela msinya izandla zakhe kuThixo.

₃₂Zikumkani zehlabathi, vumani kuThixo,

Niyibethele uhadi iNkosi; (Phakamisani.)

₃₃Ekhwela ecanda emazulwini awo amazulu amandulo;

Nanko elikhupha ilizwi lakhe, ilizwi elinamandla.

₃₄Mnikeni amandla uThixo;

Buphezu koSirayeli ubungangamsha bakhe;

Asesibhakabhakeni amandla akhe.

₃₅UloThixo woyikekayo ezingcweleni zakho.

UloThixo kaSirayeli, ubanikayo amandla nokomelela abantu.

Makabongwe uThixo.