IINDUMISO 71

₁Ndizímela ngawe, Yehova,

Mandingaze ndidane naphakade:

₂Ngobulungisa bakho ndíhlangule, ndísize;

Ndíthobele indlebe yakho, undisindise.

₃Yiba liliwa elilikhaya kum, ndize kulo ngamaxesha onke.

Uwisé umthetho wokuba ndisindiswe,

Ngokuba ingxondorha yam nemboniselo yam nguwe.

₄Thixo wam, ndísize esandleni songendawo,

Esandleni sogqwethayo nosisibhovubhovu.

₅Ngokuba ulithemba lam, Nkosi yam, Yehova,

Inkoloseko yam kwasebuncinaneni bam.

₆Ndixhaswé nguwe kwasesizalweni;

Nguwe owandityhobozisayo ezibilinini zikama.

Indumiso yam ingawe ngamaxesha onke.

₇Ndinjengesimanga kwabaninzi;

Ke wena ulihlathi lam elinqabileyo.

₈Umlomo wam uya kuzala yindumiso yakho,

Sisihombo sakho imini yonke.

₉Musa ukundilahla ngexesha lobuxhego;

Musa ukundishiya akuphela amandla am.

₁₀Ngokuba zithetha ngam iintshaba zam;

Abawulindayo umphefumlo wam bayacebisana,

₁₁Besithi, UThixo umlahlile;

Msukeleni nimbambe, ngokuba akukho mhlanguli.

₁₂Thixo, musa ukuba kude kum;

Thixo wam, khawuleza undincede.

₁₃Mabadane, bagqitywe, abawuchasayo umphefumlo wam,

Bathiwe wambu yingcikivo nehlazo abafuna ukuba ndihlelwe bububi.

₁₄Ke mna ndiya kuhlala ndilindile,

Ndongeze endumisweni yakho yonke.

₁₅Umlomo wam uya kubalisa ngemisebenzi yobulungisa bakho,

Neyosindiso lwakho imini yonke, ngokuba ndingàwazi amanani ayo.

₁₆Ndiya kuza nemisebenzi yobugorha beNkosi uYehova;

Ndiya kukhankanya ubulungisa bakho, bakho wedwa.

₁₇Thixo, undifundisile kwasebuncinaneni bam;

Unangoku ndiyayixela imisebenzi yakho ebalulekileyo.

₁₈Thixo, musa ukundishiya kude kuye ebuxhegweni nasezimvini;

Ndide ndiyixele ingalo yakho kwisizukulwana esitsha,

Nobugorha bakho kubo bonke abaya kuza.

₁₉Thixo, ubulungisa bakho buye bafika phezulu;

Wena uzenzayo izinto ezinkulu,

Thixo, ngubani na onjengawe?

₂₀Wena, usibonisileyo iimbandezelo ezininzi ezinobubi,

Ùya kubuya usiphilise,

Ubuye usirhole ezinzonzobileni zamanzi ehlabathi;

₂₁Ùya kubandisa ubukhulu bam,

Ubuye wena undithuthuzele.

₂₂Ndiya kuyibulela nokuyibulela kuwe ngomrhubhe

Inyaniso yakho, Thixo wam;

Ndiya kukubethela uhadi,

Ngcwele kaSirayeli.

₂₃Úya kumemelela umlomo wam, ndakùkubethela uhadi,

Nomphefumlo wam owukhululeyo;

₂₄Nolwimi lwam luya kuxela ubulungisa bakho imini yonke,

Ngokuba bedanile beneentloni abafuna ukuba ndihlelwe bububi.