IINDUMISO 80

₁Ulomalusi kaSirayeli, beka indlebe!

Uloqhuba uYosefu njengezimvu,

Ulohlala ezikerubhini,• bengezela!

₂Phambi koEfrayim noBhenjamin noManase,

Vusa ubugorha bakho,

Uze kusisindisa.

₃Thixo, sibuyise,

Ukhanyise ubuso bakho, sisindiswe.

₄Yehova, Thixo wemikhosi,

Kunini na uqhuma umsindo wakho ekuthandazeni kwabantu bakho?

₅Ubadlisa isonka seenyembezi,

Wabaseza iinyembezi ngemilinganiso.

₆Ùsenzé into abaxabana ngayo abamelwane bethu;

Iintshaba zethu ziyasigculela.

₇Thixo wemikhosi, síbuyise,

Ukhanyise ubuso bakho, sisindiswe.

₈Wanyothula umdiliya eYiputa,

Wagxotha iintlanga, wawutyala;

₉Wahlahla phambi kwawo,

Wendelisa iingcambu, wazalisa ilizwe.

₁₀Zagutyungelwa iintaba ngumthunzi wawo,

Nemisedare• kaThixo ngamasebe awo.

₁₁Wasa amasebe awo elwandle,

Namagatya awo kuwo uMlambo.•

₁₂Ùzityhobozeleni na iintango zawo,

Ukuze bawukhe bonke abadlula ngendlela?

₁₃Ingulube yasehlathini iyawubhuqa,

Nento edakasa endle iyawudla.

₁₄Thixo wemikhosi, khawubuye,

Uqondele usemazulwini, ubone,

Uwuvelele lo mdiliya.

₁₅Yikhusele into esiyityeleyo isandla sakho sokunene,

Unyana lo uzizimaseleyo ngokwakho.

₁₆Útshisiwe ngumlilo, uhlahliwe;

Bayadaka ngokusongela kobuso bakho.

₁₇Isandla sakho masibe phezu komfo wesandla sakho sokunene,

Phezu koonyana babantu, ozizimaseleyo ngokwakho.

₁₈Àsiyi kumka kuwe;

Síphilise, silinqule igama lakho.

₁₉Yehova, Thixo wemikhosi, sibuyise,

Ukhanyise ubuso bakho, sisindiswe.