IINDUMISO 81

₁Memelelani kuThixo, igwiba lethu,

Dumani kuThixo kaYakobi.

₂Hlabani ingoma, nibethe ingqongqo,

Uhadi olumnandi, kunye nomrhubhe.

₃Vuthelani isigodlo ukuthwasa kwenyanga,

Nokuhlangana kwenyanga, ngemini yomthendeleko wethu.

₄Ngokuba ngummiselo lowo kuSirayeli,

Lisiko likaThixo kaYakobi.

₅Sisingqiniso awasimisayo kwaYosefu,

Ekucadeni kwakhe ezweni laseYiputa;

Ndeva intetho endingayaziyo.

₆Ndawususa umthwalo egxalabeni lakhe;

Izandla zakhe zasuka ezingobozini zokuthwala.

₇Embandezelweni wadanduluka wena, ndakuhlangula;

Ndakuphendula esitheni leendudumo,

Ndakuvavanya emanzini aseMeribha.• (Phakamisani.)

₈Ndathi, Yivani, bantu bam, ndiqononondise kuni;

Sirayeli, ukuba unokuphulaphula kum!

₉Makungabikho thixo wasemzini kuwe;

Unganquli thixo wolunye uhlanga.

₁₀Ndim uYehova uThixo wakho,

Okunyusileyo elizweni laseYiputa.

Yàkhamisa, ndiwuzalise umlomo wakho.

₁₁Ke abantu bam àbáliva izwi lam,

USirayeli akandivumanga.

₁₂Ndabanikela ebungqoleni beentliziyo zabo;

Bahamba ngawabo amaqhinga.

₁₃Akwaba abantu bam bebendiva,

Akwaba uSirayeli ubehamba ngendlela yam!

₁₄Bendiya kuzithoba kamsinya iintshaba zabo,

Ndisibuyisele phezu kwababandezeli babo isandla sam.

₁₅Abamthiyayo uYehova bebeya kuhanahanisa kuye,

Libe ngunaphakade ixesha labo.

₁₆Bendiya kubadlisa ingqolowa etyebileyo,

Ndibahluthise ngobusi etsilini.