IINDUMISO 97

₁UYehova ngukumkani; liyagcoba ihlabathi,

Ziyavuya iziqithi ezininzi.

₂Ngamafu nesithokothoko ngeenxa zonke kuye,

Bubulungisa nokusesikweni ummiso wetrone yakhe.

₃Kuhamba umlilo phambi kwakhe;

Ulenya ababandezeli bakhe ngeenxa zonke.

₄Ikhanyisa elimiweyo imibane yakhe;

Ùyabona umhlaba, uzibhija-bhije.

₅Iintaba zinyibilika njengomthwebeba phambi koYehova,

Phambi kweNkosi yehlabathi lonke.

₆Izulu lixela ubulungisa bakhe,

Zilubone uzuko lwakhe zonke izizwe.

₇Badanile bonke abakhonza umfanekiso oqingqiweyo,

Abaqhayisa ngeento ezingento;

Bayamnqula bonke oothixo.

₈Iyeva, iyavuya iZiyon,

Ziyagcoba iintombi zakwaYuda,

Ngenxa yemigwebo yakho, Yehova.

₉Ngokuba nguwe, Yehova, Osenyangweni phezu kwehlabathi lonke;

Ùnyukile kunene ngaphezu koothixo bonke.

₁₀Bathandi bakaYehova, kuthiyeni okubi.

Umgcini wemiphefumlo yabenceba bakhe

Úya kubahlangula esandleni sabangendawo.

₁₁Ukukhanya likuhlwayelelwe ilungisa,

Novuyo baluhlwayelelwe abantliziyo zithe tye.

₁₂Vuyani ngoYehova, malungisa,

Nibulele isikhumbuzo sakhe esingcwele.