INGOMA YAZO IINGOMA 5

₁Ndingenile emyezweni wam, dade wethu, mtshakazi wam;

Ndiyikhile imore• yam kunye netyeleba lam;

Ndiyidlile intlango yam kunye nencindi yam;

Ndiyiséle iwayini yam kunye namasi am.

Yidlani bethu,

Selani nibe mnandi, zintánda.

₂Ndilele, yona intliziyo yam iphaphamile.

Yiva, nantso intánda yam inkqonkqoza, isithi,

Ndivulele, dade wethu, vukuthu lam, ngqibeleli yam,

Ngokuba intloko yam izele ngumbethe,

Isihlwitha sam sizele ngamathontsi obusuku.

₃Ndathi, Sendikhulule nengubo yam yangaphantsi; ndothini na ukubuya ndinxibe?

Sendizihlambile iinyawo zam, ndothini na ukubuya ndizidyobhe?

₄Intánda yam yasolula isandla sayo ngekroba;

Kwasika esiswini ngenxa yayo.

₅Ndavuka ndaya kuyivulela intánda yam,

Nezandla zam zavuza imore;

Neminwe yam, imore eyivuzelayo

Esiphathweni sesitshixo.

₆Ndayivulela mna intánda yam;

Ke yona intánda yam ibijike yemka.

Ndemkelwa ngumbilini yakuthetha;

Ndayifuna, andayifumana;

Ndayibiza, àyasabela.

₇Bandifumana abalindi abajikajika phakathi komzi,

Bandibetha, bandilimaza;

Abalindi beendonga bandihlutha ingubo yam yokwaleka ekrelekrele.

₈Ndiyanifungisa, zintombi zaseYerusalem, ukuba nithe nayifumana intánda yam,

Into enoyixelela yona, nothi, ndiyafa luthando.

₉Iyintoni na intánda yakho kunezinye iintánda,

Wena nzwakazindini phakathi kweentokazi?

Iyintoni na intánda yakho kunezinye,

Ukuba wenjenje ukusifungisa?

₁₀Intánda yam iqaqambile, iyingqombela,

Iyeyongamileyo ngaphezu kwamawaka alishumi.

₁₁Intloko yayo iyigolide engcwengiweyo, ecikizekileyo;

Isihlwitha sayo siziinduli ngeenduli, simnyama njengehlungulu.

₁₂Amehlo ayo anjengawamavukuthu, engasemifuleni yamanzi,

Ezihlamba ngamasi, ehleli njengamatye afakwe kakuhle.

₁₃Izidlele zayo zinjengemityino yetyeleba, njengezigánga zezityalo zokuqhola;

Umlomo wayo unjengeenyibiba, uvuza imore ezivuzelayo.

₁₄Izandla zayo ziintonga zegolide, zifakwe amatye aseTarshishe,

Isibili sayo siluphondo lwendlovu, lukrwilwe ngesafire.•

₁₅Imilenze yayo ziintsika zemarmore• emhlophe, zifakwe ezisekweni zegolide engcwengiweyo.

Isithomo sayo sinjengeLebhanon, sisihle njengemisedare.•

₁₆Ikhuhlangubo layo linobumnandi; inqwenelekile yona iphela.

Yiyo leyo intánda yam; nguye lowo uwethu,

Zintombi zaseYerusalem.