1 IZikhronike 11

₁U-Israyeli wonke wabuthana kuDavide eHebhroni, wathi: “Thina phela siyithambo lakho nenyama yakho. ₂Nangesikhathi esedlule, kusabusa uSawule, nguwe owawuhola impi ka-Israyeli, uphume nayo ubuye ungene nayo. USimakade uNkulunkulu wakho wathi kuwe: ‘Wena uyakwalusa abantu bami, u-Israyeli; wena uzakuba ngumbusi wabantu bami, u-Israyeli.’ ”

₃Wonke amalunga akwa-Israyeli eza enkosini eHebhroni. UDavide wenza nawo isivumelwano eHebhroni, phambi kukaSimakade. Amgcoba uDavide waba yinkosi kwa-Israyeli, njengokusho kwezwi likaSimakade ngomlomo kaSamuweli.

₄UDavide no-Israyeli wonke baya eJerusalema eliyiJebusi, lapho kwakuhlala khona izakhamuzi zakulelo lizwe, amaJebusi. ₅Abakhileyo eJebusi bathi kuDavide: “Awusoze wangena lapha.”

UDavide nokho wayinqoba inqaba iZiyoni, wayidla yaba ngumuzi wakhe.

₆UDavide wathi: “Lowo muntu oyohlabana kuqala, abulale umJebusi, nguye ozokuba yinhloko nenduna.”

UJowabe, indodana kaZeruya, wenyuka kuqala, wawudla umhlanganiso, wabe eseba yinhloko.

₇UDavide wahlala enqabeni, ngakho-ke bayibiza ngokuthi umuzi kaDavide. ₈Wakha umuzi, wayizungeza kusuka eMilo kuya kuzo zonke izindawo. UJowabe wavusa okwakusasele komuzi. ₉UDavide waqhubeka njalo wakhula, ngokuba uSimakade Wamabandla wayenaye.

₁₀Yilezi izinhloko zamaqhawe kaDavide ayenazo, ezamsekela ngamandla embusweni wakhe kanye no-Israyeli wonkana, zambeka waba yinkosi njengokwezwi likaSimakade ngo-Israyeli. ₁₁Nanti-ke inani lamaqhawe kaDavide: kwakunguJashobhehamu, indodana yomHakhimoni, inhloko yezinduna ezingama-30; wagwaza wabulala abangama-300 ngomkhonto wakhe, ngasikhathi sinye.

₁₂Wayelandelwa ngu-Eleyazare, indodana kaDodo, umAhohi, owayengomunye wamaqhawe amathathu. ₁₃Wayekanye noDavide ePhasi Damimi, ngesikhathi kubuthana amaFilisti lapho ukuyokulwa nabo. Kwakukhona isiqinti sezwe esasigcwele ibhali. Abantu babebalekile phambi kwamaFilisti. ₁₄Bama phakathi nesiqinti sezwe, basivikela, bawabulala amaFilisti. USimakade wabasindisa ngokusindisa okukhulu.

₁₅Kwathi ngesikhathi amabutho amaFilisti ekanise eSigodini samaRefa, kwehla abathathu kwabayizinhloko ezingama-30, baya etsheni kuDavide, emgedeni wase-Adulamu. ₁₆UDavide wayesenqabeni, impi yamaFilisti yayikanise ngaseBhethlehema. ₁₇UDavide wayomile, omele amanzi, wathi: “Ngubani ozakunginika amanzi asemthonjeni eBhethlehema ongasesangweni, ngiphuze na?”

₁₈Lawo maqhawe amathathu afohla, angena enkanjini yamaFilisti, akha amanzi emthonjeni eBhethlehema ongasesangweni. Awathatha awaletha kuDavide, kepha akavumanga ukuwaphuza; wawathululela uSimakade. ₁₉Wathi: “Makube kude nami, Simakade, ukuba ngenze lokhu; ngingaliphuza yini igazi lalaba bantu ababeke impilo yabo engcupheni?”

Akavumanga ukuwaphuza. Yilezi-ke izinto ezenziwa yilawo maqhawe amathathu.

₂₀U-Abhishayi, umfowabo kaJowabe, wayeyinhloko yalaba abangama-30. Wagwaza ngomkhonto wakhe abangama-300, wababulala, wazenzela igama phakathi kwalabo abathathu. ₂₁Nguye owanconywa kakhulu phakathi kwabangama-30, futhi waba ngumkhuzi wempi yabo, akafinyelelanga nokho kwabathathu bokuqala.

₂₂UBhenaya, indodana kaJehoyada, wayeyindoda eyiqhawe elinamandla, elenza imisebenzi emikhulu. WayengowaseKhabizeyeli, wabulala amaqhawe amabili, u-Ariyeli wakwaMowabi, waphinde wehla, wabulala ingonyama emgodini, ngosuku kukhithike iqhwa. ₂₃Wabulala nowaseGibhithe owayebukeka. Lona waseGibhithe wayephethe umkhonto esandleni sakhe, kodwa uBhenaya wabhekana naye ephethe induku nje. Wawuhlwitha umkhonto esandleni somGibhithe, wambulala ngawo umkhonto wakhe. ₂₄UBhenaya, indodana kaJehoyada, wenza lezi zinto, wazenzela igama phakathi kwabathathu. ₂₅Wayehlonipheke kakhulu phakathi kwabangama-30, kodwa akafikanga kulaba abathathu ngokuhlonishwa. UDavide wambeka ukuba engamele abaqaphi bakhe.

₂₆Phakathi kwalawo maqhawe anamandla kwakungo-Asaheli, umfowabo kaJowabe, u-Elihanani indodana kaDodo waseBhethlehema, ₂₇uShamothi wakwaHarori, uHelezi wasePheloni, ₂₈u-Ira, indodana ka-Ikeshi waseThekowa, u-Abhiyezeri wase-Anathothi, ₂₉uSibhekayi umHushathi, u-Ilayi umAhohi, ₃₀uMaharayi waseNethofa, uHeledi, indodana kaBhahana waseNethofa, ₃₁u-Ithayi, indodana kaRibhayi waseGibheya labozalo lukaBhenjamini, uBhenaya wasePhirathoni, ₃₂uHurayi wangasemifudlaneni kwaGahashi, u-Abhiyeli umAraba, ₃₃u-Azimavethi waseBharihumi, u-Eliyaba waseShahalibhoni, ₃₄amadodana kaHashemi waseGizoni, uJonathani, indodana kaShage waseHarari, ₃₅u-Ahiyamu, indodana kaShakhari wase-Arari, u-Elifali, indodana ka-Uri, ₃₆uHeferi waseMekheri, u-Ahiya wasePheloni, ₃₇uHeziro waseKharimeli, uNaharayi, indodana ka-Ezibhayi, ₃₈uJoweli, umfowabo kaNathani, uMibhihari, indodana kaHagiri, ₃₉uZeleki wakwa-Amoni, uNaharayi waseBherothi, udibi lukaJowabe, indodana kaZeruya, ₄₀u-Ira waseJetheri, ₄₁u-Uriya umHithi, uZabadi, indodana ka-Ahilayi, ₄₂u-Adina, indodana kaShiza wakwaRubeni, inhloko yakwaRubeni, enabangama-30, ₄₃uHanani, indodana kaMahakha, uJeshoshafathi umMitheni, ₄₄u-Uziya wase-Ashitharothi, uShama noJehiyeli, amadodana kaHothamu wase-Aroweri, ₄₅uJediyayeli, indodana kaShimri, uJoha, umfowabo umThizi, ₄₆u-Eliyeli umMahavi, uJeribhayi noJoshaviya, amadodana ka-Elinahama, u-Ithima wakwaMowabi, ₄₇u-Eliyeli, u-Obhede, noJahashiyeli umMezobha.