U-Amose 5

₂“Iwile intombi yakwa-Israyeli,

ayisayukuvuka;

ilahliwe ezweni layo,

akekho oyakuyivusa.”

“Umuzi owaphuma uyinkulungwane uyakushiya ikhulu,

nowaphuma uyikhulu uyakushiya ishumi

kuyo indlu yakwa-Israyeli.”

“Ngifuneni, niphile.

₅Kodwa ningalifuni iBhethele,

ningayi eGiligali,

ningadluleli eBheri Sheba,

ngokuba impela iGiligali liyakuthunjwa,

iBhethele liphenduke ize.

₆Funani uSimakade, niphile,

kungenjalo uyakumemetheka njengomlilo

endlini kaJosefa,

ungqongqise, kungabi bikho owucimayo eBhethele.

₇“Nina enihlanekezela ubulungiswa

bubabe njengomhlonyane,

nilaxaze phansi ukulunga;

₈lowo owenza isilimela nomthala,

oguqula ubumnyama bube yintathakusa,

aphendule ubusuku bube yimini,

obiza amanzi olwandle,

awathululele phezu komhlaba,

igama lakhe nguSimakade,

₉wehlisela imbubhiso kwabanamandla ngokuphazima,

nencithakalo yehlele izinqaba.

₁₀Bayamzonda okhuzayo esangweni;

bamenyanye okhuluma iqiniso elimsulwa.

₁₁“Ngakho-ke ngenxa yokuthi nicindezela abampofu,

nithathe kubo ngenkani okusanhlamvu,

noma ningakha izindlu ngamatshe abaziweyo,

kodwa aniyukuhlala kuzo,

noma ningatshala izivini ezinhle,

kepha aniyukuliphuza iwayini lazo.

₁₂Ngokuba ngiyazi ukuthi

iziphambeko zenu ziningi,

nokuthi izono zenu zinkulu kangakanani,

nina enicindezela abalungileyo,

nemukele umfumbathiso,

nithalalise udaba lwabantulayo esangweni.

₁₃Ngakho-ke ohlakaniphileyo uyakuthula ngaleso sikhathi,

ngokuba yisikhathi esibi.

₁₄“Funani okuhle, hhayi okubi,

ukuze niphile,

uyakuba nani uSimakade

uNkulunkulu Wamabandla,

njengoba nani nishilo kanjalo.

₁₅Zondani okubi, nithande okuhle;

niqinise ubulungiswa esangweni,

hleze uSimakade uNkulunkulu Wamabandla

ayihawukele insali kaJosefa.”

“Kuyakulilwa kuzo zonke izigcawu,

nakuyo yonke imigwaqo,

kuthiwe: ‘Maye! Maye!’

Bayakubiza umlimi ukuba akhale,

nongoti bokukhihla isililo.

₁₇Kuyakuba khona isililo nasezivinini zonke,

ngokuba ngiyakudabula phakathi kwenu,” kusho uSimakade.

₁₈Maye kini enifisa usuku lukaSimakade!

Kungani nilangazelela usuku lukaSimakade na?

Usuku lukaSimakade lungubumnyama, hhayi ukukhanya.

₁₉Kunjengokuba ethi umuntu ubalekela ibhubesi,

ahlangane nebhele,

athi uya endlini

ancike ngesandla odongeni,

alunywe yinyoka.

₂₀Ngabe usuku lukaSimakade lungubumnyama,

hhayi ukukhanya,

luyisigayegaye esingenakho ukukhanya na?

₂₁Ngiyawazonda, futhi ngiyawenqaba amadili enu,

angiyenameli nemihlangano yenu.

₂₂Impela noma ninganikela kimi

ngeminikelo yokushiswa neyokusanhlamvu,

ngeke ngiyamukele;

ngiyoyishaya indiva iminikelo yenu yokuthula

yamathole akhuluphalisiweyo.

₂₃Suka kimi nomsindo wezihlabelelo zakho,

angiyukuzwa kwamvunge yamahabhu akho.

₂₄Kepha ubulungiswa mabugeleze njengamanzi,

nokulunga njengomfula ongashi.

₂₅“Nake nangilethela yini imihlatshelo

neminikelo ehlane iminyaka

engamashumi amane,

nina ndlu ka-Israyeli na?

₂₆Seniyakuthwala uSikhuthi inkosi yenu

noKhiyuni inkanyezi kankulunkulu wenu,

izithombe zenu enizenzele zona.

₂₇Ngiyakunenza nithunjelwe phesheya kweDamaseku,”

kusho uSimakade ogama lakhe

linguNkulunkulu Wamabandla.