I-Eksodusi 38

₁Wenza i-althare lomnikelo wokushiswa ngokhuni lomkhambathi; laba ngamakhubhithi ayisihlanu ubude, namakhubhithi ayisihlanu ububanzi; laba yisikwele, nokuphakama kwalo kwaba ngamakhubhithi amathathu. ₂Wenza izimpondo emakhoneni alo omane, izimpondo zazenzelwe kulo; wazemboza ngethusi. ₃Wenza zonke izimpahla ze-althare; amabhodwe, amafosholo, imicengezi, izimfologo nemicengezi yomlilo, konke wakwenza ngethusi. ₄Walenzela i-althare inetha lethusi elenziwe njengenetha phansi konqenqema lwe-althare ukuba lifinyelele ngaphakathi kwe-althare ukuya phezulu. ₅Wenza amasongo amane okulithwala, wawabeka emakhoneni omane. ₆Wenza izingongolo ngokhuni lomkhambathi, wazicaka ngethusi, ₇wazifaka izingongolo emasongweni asezinhlangothini ze-althare, ukuze lithwalwe ngazo. I-althare walenza ngamapulangwe; laba wugobhozi.

₈Wenza umcengezi nesinqe sawo ngethusi lezibuko zabesifazane ababesebenza emnyango wethende lokuhlangana.

₉Wenza negceke; ngaseningizimu kwakulenga amakhethini enziwe ngelineni lemicu ephothiweyo ecolekileyo, lingamakhubhithi ayikhulu ubude; ₁₀izinsika zalo zazingama-20, nezisekelo zalo zethusi ezingama-20; izinkintsho zezinsika nezibopho kwakuyisiliva. ₁₁Ngasohlangothini lwasenyakatho kunamakhethini angamakhubhithi ayikhulu ubude; izinsika zawo bungama-20, izisekelo zawo ezingama-20 zilithusi, izinkintsho namabhande kulisiliva. ₁₂Ngasohlangothini lwasentshonalanga kulenga amakhethini angamakhubhithi angama-50 ubude, enezinsika ezilishumi, nezisekelo ezilishumi; izinkintsho namabhande kulisiliva. ₁₃Ngasohlangothini lwasempumalanga kungamakhubhithi angama-50. ₁₄Amakhubhithi ohlangothini lwesango ayengamakhubhithi ali-15, enezinsika ezintathu, nezisekelo ezintathu. ₁₅Ngakolunye uhlangothi kusuka ngapha kuya ngale kwesango legceke kwakulenga amakhethini angamakhubhithi ali-15, enezinsika ezintathu, nezisekelo ezintathu. ₁₆Onke amakhethini eyezungeze igceke ayenziwe ngelineni lemicu ephothiweyo. ₁₇Izisekelo zezinsika zazilithusi; izinkintsho zezinsika namabhande akhona kulisiliva; izihloko zalo zicakwe ngesiliva, zonke izinsika zegceke zinezibopho zesiliva. ₁₈Isihenqo sesango legceke sasihlotshiswe ngensonto eluhlaza okwesibhakabhaka, ngokubukhwebezane, ngokubomvu, nangelineni lemicu ephothiweyo elicolekileyo. Kwakungamakhubhithi angama-20 ubude, ukuphakama nobubanzi balo bungamakhubhithi ayisihlanu, kulingana namakhethini egceke. ₁₉Kwakunezinsika ezine nezisekelo zazo ezine kungezethusi, izinkintsho zalo kungezesiliva, izihloko zazo zembozwe ngesiliva, nezibopho zalo zingezesiliva. ₂₀Zazilithusi macala wonke zonke izikhonkwane zethabanakeli nezegceke.

₂₁Lezi kwakuyizindleko zethabanakeli; ithabanakeli lesivumelwano, ezahlanganiswa njengokuyala kukaMose, umsebenzi wabaLevi wawuphansi kuka-Ithamari, indodana ka-Aroni umphristi. ₂₂UBhezaleli indodana ka-Uri, kaHure wesizwana sakwaJuda, wenza konke lokho uSimakade ayeyale ngakho uMose. ₂₃Wayeno-Oholiyabhe indodana ka-Ahisamakhi wesizwana sakwaDani, umqophi, nengcweti yokuhlobisa, ngokuluhlaza okwesibhakabhaka, ngokubukhwebezane, ngokubomvu, nangelineni elicolekileyo.

₂₄Lonke igolide elasetshenziselwa lowo msebenzi, kuwo wonke umsebenzi wendawo engcwele, igolide lomnikelo lalingamatalenta angama-29, namashekeli angama-730 ngokweshekeli lendlu engcwele. ₂₅Isiliva elathokala enhlanganweni eyayibaliwe laba ngamathalenta alikhulu, namashekeli ayi-1 775 ngokweshekeli lendlu engcwele. ₂₆Umuntu ngamunye wanikela ngebeka, okunguhhafu weshekeli ngokweshekeli lendlu engcwele, kubo bonke ababebaliwe ngesikhathi bebalwa, kusukela kwabaneminyaka engama-20 kuya phezulu, emadodeni ayizi-603 550. ₂₇Amathalenta ayikhulu esiliva ayengawokukhanda izisekelo zendawo engcwele, nezisekelo zesihenqo; izisekelo eziyikhulu zingamathalenta ayikhulu, kuyithalenta isisekelo ngasinye. ₂₈Wenza izinkintsho zezinsika ngamashekeli ayi-1 775 wacaka izihloko zawo, wenza nezibopho zazo. ₂₉Ithusi elalinikeliwe lalingamathalenta angama-70, namashekeli ayizi-2 400; ₃₀wenza ngalo izisekelo zesango lethende lokuhlangana, i-althare lethusi, inetha lethusi, nazo zonke izimpahla ze-althare, ₃₁zonke izisekelo ezizungeze igceke, nezesango legceke, nazo zonke izikhonkwane zethabanakeli nxazonke zegceke.