UHoziya 12

₁U-Efrayimi udla umoya,

uxoshana nomoya wasempumalanga,

abhebhethekise amanga nobudlova imihla yonke.

Wenza isivumelwano ne-Asiriya,

athumele amafutha eGibhithe.

₂USimakade uthwesa uJuda icala,

uyakumjezisa uJakobe ngokwezindlela zakhe,

akhokhise kuye ngokwezenzo zakhe.

₃Esesibelethweni wabamba umfowabo ngesithende,

esenamandla wabambana noNkulunkulu.

₄Wabambana nengelosi, wanqoba;

wakhala, wanxusa kuyo isibusiso.

Yamfumana eBhethele,

yakhuluma nathi lapho,

₅uSimakade uNkulunkulu Wamabandla,

uSimakade akhunjulwa ngalo.

₆Kodwa kufanele wena

ubuyele kuNkulunkulu wakho,

ube nokwethembeka nobuqotho,

ulindele uNkulunkulu wakho njalo.

₇IKhanani liphethe izikali zenkohliso

esandleni salo,

liyakuthanda ukuqola.

₈U-Efrayimi uthi:

“Impela ngicebile,

senginentilibathwa yomcebo.

Kuzo zonke izithukuthuku zami

abayukuthola kimi okubi okuyisono.”

₉Kepha Mina nginguSimakade uNkulunkulu wakho

selokhu kwaba seGibhithe.

Ngisazokwenza futhi uhlale emathendeni

njengasezinsukwini zemikhosi enqunyiweyo.

₁₀Ngakhuluma kubaphrofethi,

ngandisa imibono,

ngenza imizekeliso ngesandla sabaphrofethi.

₁₁Ngabe iGiliyadi selonakele?

Impela abaselutho;

bahlabe izinkunzi eGiligali,

ngakho-ke ama-althare abo

ayakuba njengenqwaba yamatshe

emiseleni yamasimu.

₁₂UJakobe wabalekela e-Aramu,

u-Israyeli wasebenzela umfazi,

welusa umhlambi ukuze athathe umfazi.

₁₃USimakade wakhuphula u-Israyeli

eGibhithe ngomphrofethi,

wamlondoloza ngomphrofethi.

₁₄Kepha u-Efrayimi umchukuluze ngokwedlulele;

icala lakhe lokuchitha igazi

liyakuba phezu kwakhe,

iNkosi yakhe imthele ngehlazo lakhe.