U-Izaya 23

Lilani Mikhumbi yaseTharishishi,

ngokuba indlu yenu ishatshalalisiwe,

nokungena kwayo

ivela eKhithimi kwambuliwe.

₂Thulani nina zakhamuzi zasogwini,

nina bahwebi baseSidoni,

izithunywa zenu ziwele ulwandle,

₃emanzini amaningi;

imbewu yaseSihori

nokuvuna kweNayili

kwakuyinzuzo yalo;

laliyindawo izizwe ezazithenga kuyo.

₄Yiba nezinhloni wena Sidoni,

ngokuba ulwandle lukhulumile,

inqaba yolwandle, ithi:

“Angisikwanga,

angibelethanga,

angikhulisanga nsizwa,

angondlanga ntombi.”

₅Lapho umbiko ufinyelela eGibhithe,

liyoba sebuhlungwini ngenxa yeThire.

₆Welelani eTharishishi,

nilile, nina zakhamuzi zasogwini.

₇Ngabe ngumuzi wenu lona,

enijabula ngawo,

owavela ezinsukwini zasemandulo,

onyawo zawo zawuthwala

waze wayohlala kude na?

₈Ngubani owenze leli cebo ngeThire,

umethwesi wemiqhele,

obahwebi bakhona bekuyizikhulu,

nabathengi bakhona bengabahlonishwayo emhlabeni?

₉NguSimakade Wamabandla ocebe lokho,

ukuba konakaliswe ukuziphakamisa

kwabo bonke ubukhosi,

badeleleke bonke abadumileyo bomhlaba.

₁₀Sabalalani nezwe lonke,

nina bomuzi waseTharishishi,

kuhle komfula iNayili

lapho udla izindwani,

ugabha imfunda.

₁₁Isandla sakhe uselulele phezu kolwandle,

wazamazamisa imibuso,

uSimakade uyaleze ngeKhanani

ukuba kudilizwe izinqaba zalo.

₁₂Wathi:

“Awusayukujabula wena ntombi

ethelwe ngehlazo,

ndodakazi yaseSidoni;

vuka, uwelele eKhithimi,

nalapho awuyukukuthola ukuphumula.”

₁₃Bheka izwe lamaKhaledi,

leso sizwe asisekho,

saqedwa yi-Asiriya,

laphenduka indawo yezilwane zasendle.

Lamisa imibhoshongo yokuvimbezela,

izindlu zamakhosi lazenza ize,

izwe laphenduka incithakalo.

₁₄Lilani nina mikhumbi yaseTharishishi,

ngokuba inqaba ibhujisiwe.

₁₆“Thatha ihabhu,

uhambahambe emzini,

wena sifebe esikhohlakeleyo,

ubethe kamnandi,

uhlabelele izihlabelelo eziningi,

ukuze ukhunjulwe.”