U-Izaya 34

₁Sondelani nina zizwe, nizwe,

nina bantu, lalelani!

Mawuzwe umhlaba

nakho konke okuwugcwalisile makuzwe

izwe nakho konke okuphuma kulo.

₂Ngokuba uSimakade uthukuthelela izizwe zonke,

ufuthekela yonke impi yazo;

uzakuzibhubhisa,

azinikele ukuba zibulawe.

₃Ababuleweyo bazo bayakulahlwa ngaphandle,

kwenyuke ukunuka kwezidumbu zabo,

kuncibilike izintaba ngenxa yegazi labo.

₄Ibandla lonke ezulwini liyakuphela,

izulu lisongwe njengomqulu;

ibandla lonke liyakubuna

njengokubuna kweqabunga emvinini,

nanjengokubuna kwekhiwane emkhiwaneni.

₅Uma inkemba yami

isidle yaneliswa ezulwini,

iyokwehlela phezu kuka-Edomi

naphezu kwabantu engibamisele

ukubabhubhisa ngesehlulelo.

₆USimakade unenkemba;

igcwele igazi,

izinonisile ngamanoni

egazi lezimvana nelezimbuzi,

nangamanoni ezinso zezinqama,

ngokuba uSimakade uyanikela umhlatshelo eseBhozira,

uyazihlabela kakhulu kwa-Edomi.

₇Izinyathi ziyokuwa kanye nabo,

kuwe amavukana nezinkunzi ezinamandla.

Izwe labo liyogcwala igazi,

nothuli lwakhona lucifike amafutha.

₈Ngokuba uSimakade unosuku lwempindiselo,

unonyaka wempindiselo ngenxa yeZiyoni.

₉Imifudlana iyophenduka ikolitayi,

uthuli lwakhona lube yisibabule,

nezwe lakhona libe yikolitayi elivuthayo.

₁₀Aliyukucinywa ubusuku nemini,

intuthu yalo iyothunqa yenyuke

kuze kube phakade.

Liyohlala liyincithakalo izizukulwane ngezizukulwane,

akukho muntu oyodabula kulo nanini.

₁₁Liyakuba yifa lonogolantethe nenhloli,

kuyohlala isikhova negwababa kulo.

Uyokwelulela phezu kwalo

intambo yokukala yencithakalo,

nomthofu wokumisa okuyize.

₁₂Bayolibiza ngokuthi: umbuso ongelutho,

abantu nezikhulu zalo

bayakuba yinto engelutho.

₁₃Kuyakumila ameva namakhakhasi

ezindlini zamakhosi akhona,

izinqaba zalo zibe yikhaya lezimpisi,

nendawo yezintshe.

₁₄Izilwane zasendle ziyakuhlangana nezimpisi,

kuyakumemezana izimbuzi eziyimilalandle,

imimoya emibi yasebusuku, ihlale khona,

izitholele indawo yokuphumula.

₁₅Isikhova siyakuzakhela isidleke lapho,

sizalele kuso, size sichamsele,

sifukamele ethunzini laso;

kuyobuthana khona onhloyile,

yilowo nalowo nomngani wakhe.

₁₆Funani encwadini kaSimakade, nifunde;

akukho nokukodwa kwalokhu okungeyukuvela,

ayikho engeyukuba namngani.

Ngokuba uyalezile ngomlomo wakhe,

noMoya wakhe wakuhlanganisa.

₁₇Ukwenzele unkatho,

isandla sakhe sakukala ngentambo,

sababela, kwaba yifa labo laphakade,

izizukulwane ngezizukulwane ziyohlala kulo.