U-Izaya 40

₁Duduzani, nibaduduze abantu bami,

kusho uNkulunkulu wenu.

₂Liqungeni isibindi iJerusalema,

nimemezele kulo

ukuthi ukulwa kwalo sekuphelile,

nobubi balo buhlanguliwe,

ngokuba lamukele kuSimakade

isijeziso ngokuphindiwe

ngenxa yazo zonke izono zalo.

₃Izwi liyamemeza, lithi:

“Lungisani indlela kaSimakade ehlane,

nihlelembe umgwaqo

kaNkulunkulu wethu ongcwele.

₄Zonke izigodi ziyophakanyiswa,

zonke izintaba namagquma kuyokwehliswa;

amagebhugebhu ayakuhlelenjwa,

nemigoxigoxi iyakuba yithafa.

₅Inkazimulo kaSimakade iyobonakaliswa,

bonke abantu bayakuyibona kanyekanye

ngokuba umlomo kaSimakade ukhulumile.”

“Memeza!”

Ngathi:

“Ngiyakumemeza ngithini na?”

Bonke abantu bangutshani,

nabo bonke ubuhle babo

bunjengembali yasendle.

₇Utshani buyabuna,

imbali iyavuthuluka,

ngokuba uMoya kaSimakade uyakuphephetha.

Impela abantu bangutshani.

₈Utshani buyabuna,

imbali ivuthuluke,

kodwa izwi likaNkulunkulu wethu

limi kuze kube phakade.

₉Khuphukela entabeni ephakemeyo,

wena Ziyoni, ophethe izindaba ezinhle.

Phakamisa izwi lakho ngamandla,

Jerusalema ophethe izindaba ezinhle;

liphakamise ungesabi,

yisho emizini yakwaJuda, uthi:

“Bhekani, nangu uNkulunkulu wenu.”

₁₀Bhekani, iNkosi uSimakade iyeza ngamandla;

izobusa ngengalo yayo;

bhekani, umvuzo wayo uza nayo,

nenkokhelo yayo iphambi kwayo.

₁₁Iyokwelusa umhlambi wayo njengomelusi,

iqoqe izimvana ngezingalo zayo,

izigone esifubeni sayo,

ihole ngesinono izindlezane.

₁₂Ngubani olinganise amanzi

ngentende yesandla sakhe,

walinganisa izulu ngeminwe eyeluliweyo,

wahlanganisa uthuli esilinganisweni,

walinganisa izintaba ngesikalo

namagquma ngezisindo, na?

₁₃Ngubani oqondise uMoya kaSimakade,

wamfundisa, waba ngumeluleki wakhe na?

₁₄Welulekana nobani waze wamnika ukuqonda,

wamfundisa indlela yobulungiswa,

wamnika indlela yokwazi,

wamazisa indlela yokuqonda na?

₁₅Impela, izizwe zinjengethonsi esitsheni,

zifana nothuli esikalini;

uyakuphakamisa iziqhingi njengothuli olucolisekileyo.

₁₆ILebhanoni alanele ukushisa,

nezilwane ezikulo azanele

ukuba zibe ngumnikelo wokushiswa.

₁₇Zonke izizwe ziyinto

engelutho phambi kwakhe,

uzithatha njengento engelutho neyize.

₁₈Ningamfanisa nobani uNkulunkulu na?

Ningamqhathanisa namuphi umfanekiso na?

₁₉Isithombe esibunjwe ngumbumbi,

umkhandi wasinameka ngegolide,

wasincibilikisela amaketanga esiliva na?

₂₀Ompofu ukhetha ukhuni olungaboliyo

anikele ngalo,

bese efuna ingcweti yombazi

ukuba imenzele isithombe esibaziweyo, esingenyakaziswe.

₂₁Anazi yini?

Anizwa yini?

Anitshelwanga yini kwasekuqaleni,

aniqondanga yini kwasekusekelweni komhlaba na?

₂₂NguYena ohleli esiyingelezini somhlaba,

abakhileyo kuwo banjengezintethe;

nguyena oweneka izulu njengekhethini,

alendlale njengethende

ukuba kuhlalwe kulo;

₂₃nguyena owenza izikhulu

zibe yinto engelutho,

abehluleli babe yize.

₂₄Bathi besanda kutshalwa nje,

beqeda nje ukuhlwanyelwa,

nesiqu sabo singakagxiliswa izimpande emhlabathini,

wabaphephetha, babuna,

isivunguvungu sabasusa njengamabibi.

₂₅“Ngubani eningamfanisa nami

neningangilinganisa naye na?”

kusho oNgcwele.

₂₆Phakamiselani amehlo enu phezulu, nibone.

Ngubani odale lezo zinto na?

Nguye okhipha amaviyo azo, awabale;

azibize zonke ngamagama.

Ngokuba unamandla amakhulu

nezikhwepha zakhe zinkulu,

yingakho kungasilele neyodwa.

₂₇Ukhulumelani wena Jakobe,

usholoni wena Israyeli, ukuthi:

“Indlela yami isithekile kuSimakade,

nelungelo lami akalinaki

uNkulunkulu wami na?”

₂₈Awuzange wazi yini?

Awuzwanga yini na?

USimakade unguNkulunkulu ongunaphakade,

uMdali wemikhawulo yomhlaba,

akapheli amandla, akakhathali;

nokuqonda kwakhe akunakuphenywa.

₂₉Nguye opha oyethileyo amandla,

andise izikhwepha kongenamandla.

₃₀Izinsizwa ziyaphela amandla, zikhathale,

nabasha bawa nokuwa,

₃₁kepha abamethembayo uSimakade

bayakuthola amandla amasha,

bayakukhuphuka ngamaphiko njengezinkozi,

bagijime bengakhathali,

bahambe bengapheli amandla.