U-Izaya 65

₁“Ngavuma ukufunwa yilabo abangangicelanga,

ngafunyanwa ngabangazange bangifune,

ngathi: ‘Ngilapha, ngilapha,’

esizweni esingabizwanga ngeGama lami.

₂Ngibelulele izandla zami

usuku lonke abantu abahlubukayo,

abahamba ngendlela engeyinhle

nangokwemicabango yabo,

₃abantu abahlala njalo bengichukuluza, bengikhomba,

behlabela ezivandeni,

beshisa impepho phezu kwezitini;

₄abahlala emathuneni,

balale ezindaweni ezisithekileyo,

abadla inyama yezingulube,

benomhluzi wezinto ezinengekayo ezitsheni zabo,

₅abathi: ‘Mana khona lapho,

ungasondeli kimi,

ngokuba ngehlukanisiwe kuwe;’

laba bantu banjengentuthu emakhaleni ami,

umlilo ovutha usuku lonke.

₆“Bheka, kulotshwe phambi kwami

ukuthi: angiyukuthula, ngiyoziphindiselela,

yebo, ngiphindisele ezifubeni zabo

₇ububi babo, nobokhokho babo kanyekanye,” kusho uSimakade.

“Njengalokhu iwayini elisha

litholwa ehlukuzweni lamagilebhisi,

bese kuthiwa:

‘Ningaloni ngokuba kunesibusiso esikulo,’

ngiyokwenza kanjalo,

ngenxa yenceku yami:

angiyukubabulala bonke.

₉Ngiyakuveza izizukulwane kuJakobe,

nendlalifa yezintaba zami kuJuda;

abakhethiweyo bami bayakulidla,

nezinceku zami ziyakukwakha khona.

₁₀ISharoni liyakuba yidlelo lezimvu,

nesigodi i-Akhori sibe yindawo

yokubuthisa izinkomo kubantu bami.

₁₁“Maye, kinina enishiya uSimakade,

nikhohlwe yintaba yami engcwele,

enihlelela iNhlanhla itafula,

nenigcwalisela uMiselo iwayini elixhutshanisiweyo;

₁₂ngiyakunigweba ngenkemba,

nonke niyokhothamela ukuhlatshwa,

ngokuba ngesikhathi nginibiza, aniphendulanga;

nalapho ngikhuluma, aningizwanga;

kodwa nenze okubi emehlweni ami,

nakhetha lokho engingathokozi ngakho.”

“Niyabona-ke, izinceku zami ziyakudla,

kodwa nina niyakulamba;

bhekani, izinceku zami ziyakuphuza,

kepha nina niyokoma;

bhekani, izinceku zami ziyakuthokoza,

kodwa nina niyakujabha;

₁₄bhekani, izinceku zami ziyakumemeza ngokujabula

nangokwenama kwenhliziyo,

kepha nina niyakukhala

ngokudabuka kwenhliziyo yenu,

nilile ngobuhlungu emphefumulweni.

₁₅Niyakulishiya igama lenu,

libe yisiqalekiso kwabakhethiweyo bami,

iNkosi uSimakade iyonibulala,

ibize izinceku zayo ngelinye igama.

₁₆Ngakho-ke lowo oyobiza

isibusiso ezweni uyakuzibusisa

ngoNkulunkulu weqiniso,

nalowo ofungayo ezweni,

uyofunga ngoNkulunkulu weqiniso,

ngokuba izinhlupheko zakuqala zikhohlakele,

futhi zifihlakele emehlweni ami.”

₁₇“Ngokuba bheka, ngiyakudala izulu elisha

nomhlaba omusha;

izinto zakuqala aziyukukhunjulwa,

azinakuvuka enhliziyweni.

₁₈Kodwa jabulani nethabe kuze kube phakade

ngalokho engizakukudala,

ngokuba ngizakulenza iJerusalema libe ngukwethaba,

nabantu balo babe yinjabulo.

₁₉Ngiyakwethaba ngeJerusalema,

ngijabule ngabantu bami,

akuseyukuzwakala kulo izwi lokulila

nezwi lokukhala.

₂₀“Kusukela lapho akusayukuba khona

usana oluyophila izinsukwana,

nexhegu elingazigcwalisanga izinsuku zalo,

ngokuba oyakufa eneminyaka eyikhulu yobudala,

uyothathwa njengobesemusha;

nalowo ofa engayihlanganisanga

iminyaka eyikhulu,

kuyakuthiwa uqalekisiwe.

₂₁Bayokwakha izindlu, bahlale kuzo,

batshale izivini, badle izithelo zazo.

₂₂Abayukwakha, bese kuhlala omunye;

abayukutshala, bese kudla omunye,

ngokuba izinsuku zabantu bami

ziyokuba njengezinsuku zomuthi;

abakhethiweyo bami

bayowuthokozela isikhathi eside

umsebenzi wezandla zabo.

₂₃Abayukushikashikela ize,

noma bazale izingane bezizalela ukuhlupheka,

ngokuba bayizizukulwane zababusisiweyo bakaSimakade,

kanjalo nabantwana babo.

₂₄Kuyakuthi bengakangibizi, ngibaphendule;

besakhuluma, ngiyokuzwa.

₂₅Inkentshane liyakudla ndawonye newundlu,

ingonyama idle utshani njengenkomo,

uthuli lube ngukudla kwenyoka;

akuyukulimazana,

akuyukucekelana phansi

kuyo yonke intaba yami engcwele,” kusho uSimakade.