UJeremiya 46

₃“Lungisani amahawu nezihlangu,

nivivele ukulwa.

₄Bophelani amahhashi,

nigibele amahhashi empi,

nime ngomumo;

nifake izigqokozivikeli,

nemikhonto eloliwe,

nembathe namabhantshi ensimbi.

₅Kepha ngiboneni na?

Bayathuthumela,

babuyela emuva.

Amaqhawe abo ayakunqotshwa,

ayabaleka nokubaleka,

awasabheki emuva;

kukhona ukwesaba nxazonke,” kusho uSimakade.

₆“Onejubane makangakwazi ukubaleka,

neqhawe malingaphunyuki;

elingasenyakatho eceleni komfula u-Yufrathe,

bayakukhubeka, bawe.

₇“Ngubani lo okhuphuka njengeNayili,

njengomfula omanzi awo ephakama ngamandla.

₈IGibhithe likhuphuke njengeNayili,

amanzi alo agubha njengemifula.

Lithe: ‘Ngiyakukhuphuka,

ngiwusibekele umhlaba;

ngiwubhubhise umuzi nabahlala kuwo.’

₉Khuphukani, mahhashi,

nibhembuluke zinqola,

mawaphume amaqhawe:

uKhushe noPhuthi babambe izihlangu,

namaLudi abambe umnsalo.

₁₀Lolu lusuku lweNkosi uSimakade Wamabandla;

usuku lokuphindisela,

nolokuziphindiselela ezitheni zakhe.

Inkemba iyakudla yesuthe,

iyakuzanelisa ngegazi labo,

ngokuba iNkosi uSimakade Wamabandla

inomhlatshelo enyakatho,

ngasemfuleni iYufrathe.

₁₁“Khuphukela kwaGileyadi, ubuthe ibhalisamu,

wena ntombi, ndodakazi yaseGibhithe,

uyisebenzisela ize imithi eminingi,

ngeke waphulukiswa.

₁₂Izizwe ziyakuzwa ngehlazo lakho,

ukukhala kwakho kugcwale umhlaba;

ngokuba iqhawe liyakukhuba elinye,

awe omabili kanyekanye.”

₁₄“Memezelani eGibhithe,

nimemezele eMigidoli;

yenzani isimemezelo eNofi naseThahiphanesi, nithi:

‘Sukumani, nime ngomumo,

ngokuba inkemba izodla nxazonke zakho.’

₁₅Kungani abanamandla bakho belaliswe phansi na?

Yingoba uSimakade ebathele othulini na?

₁₆Uyakukhubekisa izindimbane,

yebo, bayakuwa

omunye ewela phezu komunye,

bathi: ‘Vukani,

masibuyele kwabakithi,

ezweni esidabuka kulo;

sibaleke enkembeni yomcindezeli.’

₁₇Bayakumemeza lapho, bathi:

‘UFaro inkosi yaseGibhithe

ungumsindo nje omkhulu,

uliyekile ithuba lakhe.’

₁₈“Ngifunga ngiyagomela,”

kusho iNkosi, egama layo kunguSimakade Wamabandla,

“kukhona ozayo ofana neThabhori

phakathi kwezintaba,

nanjengeKharmeli ngasolwandle.

₁₉Qoqa amasaka akho ulungele ukuthunjwa,

wena ndodakazi yaseGibhithe,

ngokuba iMemfisi iyakuba yincithakalo,

iyakushiswa kungabe kusaba bikho ohlala kulo.

₂₀“IGibhithe liyisithokazi esihle kakhulu,

kodwa kunesibawu esivela enyakatho, esizakulithelekela.

₂₁Ngisho namabutho alo aqashiwe, aphakathi kulo,

anjengamathole akhuluphalisiweyo;

nawo aphenduka abaleka

kanyekanye, awazange eme

ngokuba usuku lwabo lwenhlekelele selufikile;

isikhathi sokujeziswa kwabo.

₂₂IGibhithe liyakuhashaza njengenyoka ihamba,

ngoba beza ngamandla,

balithelekele bephethe izimbazo

njengabagawuli bezihlahla.

₂₃Bazoligawula ihlathi lalo,” kusho uSimakade,

“nakuba licinene;

ngokuba baningi kunesikhonyane, abanakubalwa.

₂₄Indodakazi yaseGibhithe izothelwa ngehlazo,

inikelwe esandleni sabantu basenyakatho.”

₂₇“Kepha ungesabi wena Jakobe,

nceku yami;

ungadangali, Israyeli,

ngokuba bheka, ngiyakukusindisa usendaweni ekude;

ngisho nabozalo lwakho ezweni abathunjelwe kulo.

UJakobe uyakuba ongaphazanyiswa lutho, avikeleke,

angasatshiswa muntu.

₂₈Ungesabi wena nceku yami, Jakobe,” kusho uSimakade,

“ngokuba nginawe;

ngiyakuqeda ngokuphelele zonke izizwe

engikuxoshele kuzo,

kodwa wena angiyukukuqeda.

Ngiyakukuyala ngobulungiswa,

angiyukukuyeka ngingakujezisi.”