UJeremiya 6

₁“Bantu bakwaBhenjamini,

balekani niyocasha,

nisuke eJerusalema,

nibethe amacilongo eThekhowa,

niphakamise insika yomusi eBhethi Hakeremi,

ngokuba inhlekelele ilunguza ivela ngasenyakatho

nokubhubhisa okukhulu.

₂Indodakazi uZiyoni ngiyifanisa nedlelo elihle.

₃Abelusi nemihlambi yabo bayotheleka kuyo,

bamise amathende abo ngakuyo,

nxazonke, beluse,

kube yilowo nalowo endaweni yakhe.

₄“Zingcweliseleni ukulwa nayo;

vukani, masihlasele emini.

Maye, kithi!

Ngokuba ilanga seliyashona,

namathunzi okuhlwa aselulekile.

₅Vukani, masihlasele ebusuku,

masizibhubhise izinqaba zalo.”

“Gawulani imithi yalo,

ninqwabele indunduma ngakulo iJerusalema.

Umuzi wonke uyojeziswa,

ngayo yonke ingcindezelo ephakathi kwawo.

₇Njengomthombo ogcina amanzi awo emahle,

nalo ligcina kanjalo ububi balo;

ubudlova nokucekela phansi kuyezwakala kuwo;

ukugula namanxeba kuphambi kwami njalo.

₈Xwaya, Jerusalema, funa ngikufulathele,

ngikwenze incithakalo,

izwe okungahlalwa kulo.”

“Insali yakwa-Israyeli

bayakuyikhothoza nokuyikhothoza njengomvini.

Njengovuna amagilebhisi,

yedlulisa isandla sakho phezu kwamagatsha.”

₁₀Ngiyokhuluma kubani,

ngixwayise bani,

ukuze balalele na?

Bheka, izindlebe zabo ezingasokiwe azizwa,

izwi likaSimakade seliphenduke ihlazo kubo,

abathokozi ngalo.

₁₁Ngakho-ke ngigcwele ulaka lukaSimakade,

ngikhathele ukuzibamba.

“Luthululele phezu kwabantwana emigwaqweni,

nasemhlanganweni wezinsizwa,

indoda nomkayo bayakubanjwa

kanjalo abadala nabagugileyo.

₁₂Izindlu zabo, amasimu abo

nomkabo kuyakunikelwa kwabanye kanyekanye,

ngokuba ngiyakwelulela isandla sami

kwabakhile ezweni,” kusho uSimakade.

₁₃“Kusukela ezinganeni

kuya kwabadala bakhona,

bonke bazuza inzuzo engafanele,

nabaphrofethi nabaphristi baqamba amanga.

₁₄Belaphile ukuphoqoka kwabantu bami ngokuyekethisa,

bethi: ‘Ukuthula, ukuthula,’

kepha kungekho ukuthula.

₁₅Abanamahloni ngenxa yezinengiso abazenzileyo,

abanamahloni nakancane,

abakwazi nokukhophoza;

ngalokho bayakuwela kulabo asebewile;

ngesikhathi sokubajezisa kwami

bayakukhubeka,” kusho uSimakade.

“Yimani ezindleleni, nibone,

nibuze ngemikhondo yasemandulo

ukuthi ikuphi indlela enhle,

nihambe kuyo,

niyakufumana ukuphumula kwemiphefumulo yenu,

kepha, bathi:

‘Asiyukuhamba kuyo.’

₁₇Ngase ngibeka abalindi phezu kwenu,

ngithi: ‘Lalelani ukukhala kwecilongo,’

kepha, bathi:

‘Asiyukulilalela.’

₁₈Ngalokho zwanini nina zizwe,

wazi wena bandla

ukuthi kuzokwenzakalani kubo.

₁₉Yizwa wena mhlaba,

bheka, ngiyakwehlisela inhlekelele

phezu kwalaba bantu,

isithelo samacebo abo,

ngokuba abawalalelanga amazwi ami,

nomthetho wami bawulahlile.

₂₀Inalusizo luni kimi inhlaka evela eShebha,

nomhlanga othaphukayo ovela ezweni elikude na?

Iminikelo yenu yokushiswa ayamukeleki,

nemihlatshelo yenu ayimnandi kimi.”

“Ngiyakubekela laba bantu izikhubekiso,

oyise namadodana bayakukhubeka kanyekanye kuzo,

umakhelwane abhubhe nomngani wakhe.”

“Kuzakufika abantu bevela ezweni elisenyakatho;

isizwe esikhulu siyakuvuswa ekugcineni komhlaba.

₂₃Babamba umnsalo nomkhonto;

banonya, abanamusa,

izwi labo liduma njengolwandle,

bagibele amahhashi,

bahleliwe njengamabutho eyokulwa,

bahlelelwe ukulwa nawe, ndodakazi uZiyoni.”

₂₄Siyizwile imibiko ngabo:

izandla zethu zayetha;

usizi lusikhungethe,

lunjengemihelo yokubeletha.

₂₅Ningaphumeli endle,

ningahambi emgwaqweni,

ngokuba isitha sinenkemba,

kugcwele ukwesabeka nxazonke.

₂₆Ndodakazi yabantu bami,

bhinca indwangu eyisaka,

uzigingqe emlotheni,

ulile sengathi ulilela indodana eyodwa,

ukukhala okulusizi,

ngokuba umbhubhisi uzotheleka

phezu kwakho masinyane.

₂₇“Ngikubekile ukuba ube ngumhloli

nenqaba phakathi kwabantu bami,

ukuze uqaphe,

futhi uhlole inkambo yabo.

₂₈Bahlubukile bonke nokuhlubuka,

bahamba behleba;

bayithusi nensimbi,

bangababhubhisi bonke.

₂₉Indawo engaphansi iyafutha,

umthofi udliwe ngumlilo;

impela bahlungelwa ize nje,

ngokuba ababi abakhishiwe.

₃₀Bayakuthiwa amanyela esiliva,

ngokuba uSimakade ubalahlile.”