UJobe 14

₁“Umuntu ozelwe ngowesifazane

imihla yakhe mifushane,

igcwele inkathazo.

₂Uyaqhakaza njengembali,

abuye abune,

ubalekisa okwethunzi,

akami ndawonye.

₃Ngabe ugxilisa amehlo akho konje,

ungiyisa ekwehlulelweni

kanye nawe na?

₄Ngubani ongaveza

okuhlanzekile kokungcolile na?

Akekho noyedwa.

₅Uma imihla yakhe inqunyiwe,

nenani lezinsuku zakhe zikuwe,

uwumisile umkhawulo wakhe,

akasoze aweqa.

₆Bheka kude naye,

uke umyeke,

aze athokoze osukwini lwakhe, njengomqashwa.

₇“Ngokuba kukhona ithemba emthini:

uma unqunywa,

uyakubuye uhlume,

nehlumela lawo aliyukuphela.

₈Noma impande yawo

iguga emhlabathini,

nesiqu sawo sifela othulini,

₉ngephunga lamanzi uyakuhluma,

uveze amagatsha njengesithombo.

₁₀Kepha umuntu uyafa,

abe buthakathaka,

umuntu obhubhile uphi na?

₁₁Njengamanzi anyamalele olwandle,

nomfula oshile waze woma,

₁₂kanjalo umuntu ulala phansi,

angabe esavuka,

lize lingabi bikho izulu abayukuvuka,

abayukuphaphanyiswa ebuthongweni babo.

₁₃Sengathi ungangifihla endaweni yabafileyo,

ungisithe kuze kudlule intukuthelo yakho,

unginqumele isikhathi, ungikhumbule.

₁₄Uma umuntu efa, uyakubuye aphile yini na?

Bengiyakulinda zonke izinsuku zomshikashika wami,

kuze kufike ukuphunyuzwa kwami.

₁₅Uyakungibiza, ngisabele,

uyakuwulangazelela umsebenzi wezandla zakho,

₁₆ngalokhu awuyukuzibala izinyathelo zami,

awuyukusinaka isono sami.

₁₇Isiphambeko besiyakuvalelwa esikhwameni,

bese usibekela ukona kwami.

₁₈“Kepha intaba iyawa, idilike,

nedwala lisuswe endaweni yalo,

₁₉amanzi ayagudla amatshe,

ukuphuphuma kwawo kukhukhula uthuli lomhlaba,

nethemba lomuntu lishafiswe kanjalo.

₂₀Uyamehlula kuze kube phakade,

ahambe,

uyabuguqula ubuso bakhe,

umhambise.

₂₁Amadodana akhe ayahlonishwa,

engazi yena,

ayehliswa,

yena angakuboni lokho.

₂₂Umzimba wakhe kuphela ozwa ubuhlungu,

umphefumulo wakhe

umlilele wona kuphela.”