UJobe 21

₂“Walaleleni ngokucophelela amazwi ami;

lokhu makube yinduduzo evela kini.

₃Ngibekezeleleni, ngizakukhuluma,

ningangiklolodela-ke lapho sengiqedile ukukhuluma.

₄“Ngabe ukukhononda kwami kungomuntu yini na?

Kungani umphefumulo wami ungebekezele na?

₅Ngibhekeni, nishaqeke,

nibambe ongezansi.

₆Uma ngikhumbula lokhu, ngiyaphazamiseka,

ukwesaba kuhlasimulise umzimba wami.

₇Kungani izikhohlakali ziphila,

zize zibe zindala,

yebo, zidlondlobale

zibe namandla na?

₈Abantwana bazo bekhula

bamiswe phambi kwazo,

nozalo lwazo, phambi kwamehlo azo.

₉Izindlu zazo zivikelekile,

akukho ukwesaba kuzo;

uswazi lukaNkulunkulu alukho phezu kwazo.

₁₀Inkunzi yazo iyakhwela, kayiphuthi;

inkomazi yazo iyazala, kayiphunzi.

₁₁Zikhipha amankonyane azo njengomhlambi;

abantwana bazo bayatshakadula.

₁₂Bahlabelela ngesigubhu nangehabhu,

bathokoza ngomsindo womtshingo.

₁₃Ziphetha imihla yazo ngokuhle,

zehlela endaweni yabafileyo ngokuthula.

₁₄Nokho zithe kuNkulunkulu:

‘Suka kithi, asifuni

ukwazi izindlela zakho.

₁₅USomandla uyini ukuba simkhonze na?

Siyakuzuzani uma sikhuleka kuye na?’

₁₆Bhekani, impumelelo yazo isezandleni zazo;

izeluleko zezikhohlakali zikude nami.

₁₇“Kukangaki lapho isibani sezikhohlakali

sicinywa khona,

zehlelwe yinhlekelele,

zabelwe isabelo ngentukuthelo yakhe na?

₁₈Zifana nezibi phambi komoya,

namakhoba epheshulwa yisiphepho.

₁₉UNkulunkulu ukubekele abantwana bazo

ukukhohlakala kwazo,

kodwa makabuphindisele kuzo uqobo,

ukuze zikwazi.

₂₀Mazikubone ukubhubha kwazo ngamehlo azo,

ziphuze intukuthelo kaSomandla.

₂₁Zinandabani nabendlu yazo uma sezingasekho,

lapho umumo wezinyanga zazo usunqunyiwe na?

₂₂Ukhona yini ongafundisa uNkulunkulu ukwazi,

Yena owehlulela abaphakemeyo na?

₂₃“Omunye ufa esemi kahle kukho konke,

ezinzile, enokuthula.

₂₄Umzimba wakhe unonophele,

umnkantsha wamathambo akhe ucebile.

₂₅Omunye ufa enomphefumulo onomunyu,

engakaze adle okuhle.

₂₆Bayolala phansi othulini kanyekanye,

izimpethu zibemboze.

₂₇Bhekani, ngiyayazi imicabango yenu,

namacebo enu enifuna ukungihlukumeza ngawo.

₂₈Nithi: ‘Iphi indlu yezikhulu,

liphi ithende elihlala izikhohlakali na?’

₂₉Anibabuzanga yini abadlula ngendlela?

Anibamukeli yini ubufakazi babo

₃₀bokuthi omubi

uyokophulwa ngosuku lwenhlekelele,

nokuthi bayaphunyuka ngosuku lwentukuthelo na?

₃₁Ngubani oyakumtshela kwezikabhoqo

ngendlela yakhe na?

Ngubani oyakuphindisela

ngalokho akwenzileyo na?

₃₂Uyakuyiswa ethuneni,

kube khona olinda elibeni.

₃₃Amagabade asesigodini ayakuba mnandi kuye;

bonke abantu bayakumlandela

njengokuba bengenakubalwa

nababephambi kwakhe.

₃₄“Pho ningiduduzelani ngeze,

lokhu ezimpendulweni zenu

kusele inkohliso yodwa na?”