UJobe 26

₂“Umsize kanjani ongenamandla na?

Wayisindisa kanjani ingalo engenamandla na?

₃Umeluleke kanjani ongahlakaniphile na?

Wamnika izeluleko ezinhle kangakanani ongenakuqonda na?

₄Usizwe ngubani ukuba usho lawo mazwi?

Uwafunzwe ngubani uze ukhulume kanjena na?

₅“Izithunzi ziyathuthumela phansi kwamanzi,

nakho konke okuhlala kuwo.

₆Indawo yabafileyo inqunu phambi kwakhe,

asikho isembozo sendawo yokubhubha.

₇Wendlala inyakatho phezu kweze,

aphanyeke umhlaba ezeni.

₈Ubopha amanzi emafini akhe,

ifu alidabuki phansi kwawo.

₉Usibekela ubuso besihlalo sakhe sobukhosi,

aneke ifu lakhe phezu kwaso.

₁₀Udweba isiyingelezi phezu kwamanzi,

sibe ngumngcele phakathi kokukhanya nobumnyama.

₁₁Izinsika zezulu ziyathuthumela,

zethuswa ngukukhuza kwakhe.

₁₂Unyakazise ulwandle ngamandla akhe;

ngokuqonda kwakhe wambhubhisa uRahabi.

₁₃Ngomoya wakhe amazulu ayakhazimuliswa;

isandla sakhe sabhokoda inkanyamba eshwibekayo.

₁₄Bheka, lokho kuyisiphetho sezindlela zakhe,

izwi elinyenyezayo esilizwayo ngaye,

kodwa ukuduma kwamandla akhe

ngubani ongakuqonda na?”