UJobe 35

₂“Ucabanga ukuthi lokhu kulungile yini na?

Uthi: ‘Mina ngilungile phambi kukaNkulunkulu,’

₃uthi: ‘Kungisiza ngani na?’

nokuthi: ‘Ngizuzeni ebengingayizuza

uma bengingonanga na?’

₄“Ngizoniphendula mina,

wena nabangani bakho.

₅Bheka ezulwini, ubone,

uqaphele ukuthi amafu angaphezu kwakho.

₆Uma wona, wenzani kuye na?

Uma wenza iziphambeko eziningi

kwenzani kuye lokho na?

₇Uma ulungile, utholani yena ngalokho,

uzuzani esandleni sakho na?

₈Ukukhohlakala kwakho kuthinta abanye abantu

abafana nawe,

kanjalo nokulunga kwakho

kuthinta abanye abantu.

₉“Ngenxa yokwanda kokucindezelwa,

abantu bayakhononda,

bayakhala, banxusa ukusizwa

esandleni esinamandla.

₁₀Kepha akekho othi:

‘Uphi uNkulunkulu, uMdali wami

ovusa ingoma kwesikabhadakazi.

₁₁Thina nezilwane zomhlaba usifundisa okuningi,

asenze sihlakaniphe kakhulu

kunezinyoni ezindiza emkhathini.’

₁₂Abantu akabaphenduli uma bekhala,

ngenxa yokuzikhukhumeza kwezikhohlakali.

₁₃Impela uNkulunkulu akakulaleli ukukhala okuyize,

uSomandla akakugqizi qakala.

₁₄Kakhulu kangakanani uma uthi awuboni,

nokuthi icala liphambi kwakhe,

wena ulindele Yena!

₁₅Kepha manje,

ngoba intukuthelo yakhe ayijezisi,

akazinaki kakhulu iziphambeko,

₁₆uJobe uvula umlomo wakhe,

akhulume okuyize,

wandisa amazwi engenalwazi.”