UJobe 9

₂“Impela ngiyazi ukuthi kunjalo,

kodwa umuntu angaba kanjani ngolungileyo

phambi kukaNkulunkulu na?

₃Uma efuna ukuthetha icala naye,

angemphendule nakwelilodwa kwayinkulungwane.

₄Uhlakaniphile ngenhliziyo,

unamandla amakhulu,

ngubani owake wamelana naye, waphumelela na?

₅Yena ogudluza izintaba, zingazi,

Yena ozigumbuqela ngentukuthelo yakhe,

₆ozamazamisa umhlaba usuke endaweni yawo,

kuthuthumele izinsika zawo,

₇oyala ilanga lingaphumi,

avalele izinkanyezi,

₈oweneka izulu yedwa,

ahambe phezu kwamaza olwandle,

₉owenza iNdonsa,

iKhwezi,

iSilimela, iSicelankobe

noMthala oseningizimu,

₁₀owenza izinto ezinkulu ezingenakukhohlweka,

yebo, izimangaliso ezingenakubalwa.

₁₁Bheka, uyedlula

ngakimi, ngingaboni,

uyedlula, kodwa ngingamuzwa.

₁₂Bheka, uyabamba,

ngubani ongamkhalima na?

Ngubani oyakusho kuye, athi:

‘Wenzani na?’

₁₃“UNkulunkulu akayukulunqanda ulaka lwakhe;

bayakhothama abasizi bakaRahabi phansi kwakhe.

₁₄Pho mina ngingamphendula ngithini,

ngingawathathaphi amazwi aqondene naye na?

₁₅Noma ngingenacala, angikwazi ukumphendula,

kufanele ngicele umusa kumehluleli wami.

₁₆Uma bengimbizile wase engiphendula,

angikholwa ukuthi ulilalele izwi lami.

₁₇Ngokuba uyangilimaza ngesiphepho,

wandisa amanxeba ami ngaphandle kwesizathu.

₁₈Akangivumeli ukuba ngiphefumule,

kepha ungigcwalisa ngomunyu.

₁₉Ukuba besizwana amandla, nguye onamandla.

Ukuba bekungubulungiswa,

ngubani ongambizela icala na?

₂₀Nakuba ngilungile,

umlomo wami uyakungilahla,

noma ngimsulwa, uyakungibeka icala.

₂₁Ngimsulwa, kodwa angizazi,

ngiyakuzonda ukuphila kwami.

₂₂Ngakho-ke konke kuyafana, yingakho ngithi:

‘Ubhubhisa omsulwa nesikhohlakali.’

₂₃Uma kwehla inhlekelele ngokuzuma,

uyakuhleka ukuphelelwa yithemba kwabangenacala.

₂₄Umhlaba unikelwe esandleni sezikhohlakali,

uyabumboza ubuso babehluleli bawo,

uma kungesiye, pho ngubani na?

₂₅“Izinsuku zami ziyashesha ukwedlula umgijimi,

ziyabaleka zingakubonanga okuhle.

₂₆Zitshuza njengesikebhe somhlanga,

nanjengokhozi luphuthuma ukudla kwalo.

₂₇Uma ngithi: ‘Ngizokhohlwa ngukukhononda,

ngizoyeka ukunyukubala, ngithakase,’

₂₈nokho ngiyabesaba

bonke ubuhlungu bami,

ngiyazi awuyukungithatha njengongenacala.

₂₉Mina ngizolahlwa ngecala,

pho kungani ngikhandlekela ize na?

₃₀Noma ngingageza ngamanzi eqhwa,

ngihlanze izandla zami ngensipho,

₃₁nokho uyakungicwilisa emgodini,

nginengwe yizingubo zami.

₃₂Ngokuba akasiye umuntu njengami

ukuba bengingaqagulisana naye,

nokuba ngibhekane naye esigcawini.

₃₃Akukho mlamuli phakathi kwethu,

ongabeka isandla sakhe

phezu kwethu sobabili, asilamule.

₃₄Makayisuse induku yakhe kimi,

nengebhe yakhe ingangesabisi,

₃₅khona ngiyokhuluma ngingamesabi,

ngoba angiyikho lokhu

okucatshwangwa ngami.”