ISililo 1

₁Maye! Waze wasala dengwane

umuzi obugcwele abantu!

Sewuphenduke umfelokazi

phakathi kwezizwe.

Owesifazane obehloniphekile

phakathi kwezifunda,

usephenduke isigqila.

₂Ebusuku ukhala kalusizi,

kugeleza izinyembezi ezihlathini;

akasekho omduduzayo,

phakathi kwezithandwa zakhe.

Bonke abangani bakhe abebemkhohlisa,

sebephenduke izitha zakhe.

₃UJuda usekuthunjweni,

ngenxa yokuhlupheka

nangenxa yobugqila obukhulu;

uhlala phakathi kwezizwe,

akakutholi ukuphumula.

Bonke abamxoshayo,

bamficile phakathi kobuhlungu.

₄Imigwaqo yaseZiyoni iyalila,

akusekho muntu osaya

emikhosini emisiweyo;

onke amasango akhona aseyincithakalo,

abaphristi bakhona bayabubula,

izintombi zakhona ziyahlupheka;

nalo linomunyu.

₅Abamelene nalo sebephenduke banjengamakhosi,

izitha zalo zinokuthula.

USimakade ulihluphile

ngenxa yobuningi beziphambeko zalo.

Izingane zalo sezihambile,

zisekuthunjweni, ebusweni besitha.

₆Bonke ubukhazikhazi sebuphelile

endodakazini iZiyoni;

izikhulu zakhona sezinjengezinyamazane

ezingafumani dlelo,

zihamba zingenamandla

phambi kwabazixoshayo.

₇IJerusalema ekuhluphekeni

nasekuzulazuleni kwalo,

liyazikhumbula zonke

izinto ezinhle elalinazo emandulo.

Lapho abantu balo

bewela esandleni sesitha,

akubanga bikho muntu owabasiza.

Isitha sabukela,

sababhinqa ngokuwa kwalo.

₈IJerusalema lone kakhulu,

ngakho-ke seliyisinengiso;

bonke abebelihlonipha sebeyaledelela,

ngokuba bebone ubunqunu balo;

nalo seliyabubula,

liphenduka libafulathela.

₉Ukungcola kwalo kusemphethweni wezingubo zalo,

alicabanganga ngomphumela wokona kwalo,

liwile ngendlela emangalisayo,

akekho ongaliduduza.

Bheka Simakade, ukuhlupheka kwami,

ngokuba isitha sinqobile.

₁₀Isitha selulele isandla saso

phezu kwakho konke okuthandekayo kwalo.

Impela libabonile abezizwe

bengena endaweni yalo engcwele;

labo owayala ukuba bangangeni

ebandleni lakho.

₁₁Bonke abantu bakhona

bayabubula, befuna isinkwa.

Bakhipha okuthandekayo kwabo

ngokuba befuna ukudla

ukuze basimamise umphefumulo.

Bheka, Simakade, ubone,

ngokuba sengiphenduke

into eyedelelwayo.

₁₂Akunithinti yini nina nonke

enedlula ngendlela na?

Bhekani nibone

ukuthi bukhona yini ubuhlungu

obunjengobuhlungu obehliselwe mina,

uSimakade angihluphekise ngabo

ngosuku lolaka lwakhe oluvuthayo.

₁₃“Uthumele umlilo wakhe ekweliphezulu,

wangena emathanjeni ami,

wawehlula;

unekele izinyawo zami inethi,

wangiqumba phansi;

ngalala amankeyane.

Ungishiye ngiyincithakalo,

ngiphelelwe ngamandla usuku lonke.

₁₄“Iziphambeko zami ziboshelwe ejokeni

ngesandla sakhe,

waziphica ndawonye

wazibeka entanyeni yami;

wanqinda namandla ami.

USimakade unginikele

ezandleni zalabo engingakwazi

ukumelana nabo.

₁₅“INkosi uSimakade iwalaxazile

onke amaqhawe ami,

ibize imbizo ukuze imelane nami;

ifihlize izinsizwa zami,

kuhle kwesikhamo sewayini

inyathele intombi eyindodakazi yakwaJuda.

₁₆“Ngenxa yalokho ngiyakhala,

ngikhihla isililo,

ngokuba akukho mduduzi

eduze nami

obezohlumelela umoya wami.

Abantwana bami bayincithakalo,

ngoba isitha singehlulile.”

₁₇IZiyoni lelula izandla zalo,

akukho noliduduzayo.

USimakade uyalile ngoJakobe

ukuthi labo abamzungezile

bayoba yizitha zakhe.

IJerusalema seliphenduke

isinengiso phakathi kwabo.

₁₈“USimakade ungijezise ngokufanele,

ngokuba angililalelanga izwi lakhe.

Lalelani bantu,

bukani nibone ubuhlungu bami.

Izintombi nezinsizwa zami

zihambile, zisekuthunjiweni.

₁₉“Izithandwa zami ngazibiza,

zona zangikhohlisa.

Abaphristi namalunga ami

bafele emzini,

bezama ukufuna ukudla

ukuze basimamise ukuphila kwabo.

₂₀“Bheka, Simakade,

ngokuba ngilusizi,

kuphethuka izibilini.

Inhliziyo yami iyayaluza ngaphakathi,

ngokuba ngihlubuke kakhulu.

Ngaphandle inkemba idla lubi;

endlini ngukufa kodwa.

₂₁“Bangizwile ngibubula,

kepha akekho ongiduduzile.

Zonke izitha zami

zizwile ngosizi lwami,

zajabula ukuthi nguwe ongenze nje.

Lwenze lufike lolo suku

owamemezela ngalo,

zenze nazo zifane nami.

₂₂“Bonke ububi bazo

mabufinyelele ebusweni bakho,

nakuzo yenza njengoba wenze kimi,

ngenxa yazo zonke iziphambeko zami,

ngokuba kukhulu ukububula kwami;

idangele nenhliziyo yami.”