ISililo 3

₁Ngingumuntu ohlupheke kakhulu,

uNkulunkulu ungijezisile ngentukuthelo yakhe.

₂Ungixoshele ebumnyameni obukhulu.

₃Ungishaye ephindelela ubusuku nemini,

engenqabela ukuba ngisondele kuye.

₄Ugugise inyama yami nesikhumba sami;

wephula amathambo ami.

₅Wakhe udonga,

wangibiyela ngobuthi nobunzima.

₆Ungihlalise ebumnyameni obunzulu,

njengalabo abafa kudala.

₇Ungihaqe nxazonke, angikwazi ukuphunyuka,

wangibopha ngamaketanga asindayo.

₈Nalapho ngikhala ngicela usizo,

akawunakanga umkhuleko wami.

₉Izindlela zami uzibiyele ngomthangala wamatshe,

indlela yami wayigwegwisa.

₁₀Ufane kimi nebhele elicuthileyo,

nanjengengonyama icuthe endaweni esithekileyo.

₁₁Ungichezukise endleleni yami,

wanginikiza ngaba yizicutshana,

wangishiya ngimantwenguntwengu.

₁₂Wakhokha umnsalo wakhe,

wangimisa ngaba yinkololo yemicibisholo yakhe.

₁₃Wangihlaba ezinsweni ngemicibisholo yomgodla wakhe.

₁₄Sengiyinhlekisa kubo bonke abantu bakithi,

bahaya ngami izingoma nsuku zonke.

₁₅Ungisuthise ngomunyu,

wangiphuzisa inyongo.

₁₆Ungiqumbe othulini,

amazinyo ami ephulwa ngumgubane.

₁₇Ungemuke ukuthula,

angisakwazi ukujabula,

nezinto ezinhle azisekho.

₁₈Ngase ngithi:

“Angisakwazi ukubekezela;

nethemba lami kuSimakade alisekho.”

₁₉Uma ngikhumbula ukuhlupheka kwami

nokuba ngumhambuma,

kufana nenhlaba nenyongo.

₂₀Lapho ngicabanga ngalezi zinto, ngiyadideka.

₂₁Noma kunjalo ngisazoqhubeka ngibe nethemba,

uma ngicabanga ngoSimakade.

₂₂Uthando lwakhe lungunakaphakade,

ububele bakhe abunamukhawulo.

₂₃Kusha nsuku zonke,

ukwethembeka kwakhe kukhulu.

₂₄Ngathi: “USimakade uyisabelo sami,

ngakho-ke ngizokwethembela kuye.”

₂₅USimakade muhle kulowo omlindelayo,

kulowo omfunayo.

₂₆Kuhle ukulindela ngokuthula

ukusindisa kukaSimakade.

₂₇Kuhle ukuba umuntu

athwale ijoka esemusha.

₂₈Makahlale yedwa, athule,

ngokuba nguSimakade omethwese lona.

₂₉Makabeke umlomo wakhe othulini,

hleze lingakhona ithemba.

₃₀Makamnike isihlathi ommukulayo,

asuthe inhlamba.

₃₁Ngokuba iNkosi ayinakusilahla

kuze kube phakade.

₃₂Noma ikudabukisile,

iyokuhawukela ngobukhulu bobubele bayo.

₃₃Ngokuba akuveli enhliziyweni yayo ukuhlupha,

nokudabukisa abantwana babantu.

₃₄Lapho zonke iziboshwa

emhlabeni zidovadovwa ngezinyawo;

₃₅nalapho ubulungiswa buphanjaniswa

phambi koPhezukonke;

₃₆lapho icala lomangalelwe lihlanekezelwa,

ngabe iNkosi ayikuboni lokho na?

₃₇Kukhona yini ongahlela

bese enza akuhlelile,

uma iNkosi ingakuvumelanga na?

₃₈Ngabe okuhle nokubi akwenzeki yini

ngokuyala koPhezukonke na?

₃₉Kungani ukuba umuntu

akhononde ngempilo yakhe na?

Makakhononde ngezono zakhe.

₄₀Masibheke, sihlolisise izenzo zethu,

sibuyele eNkosini.

₄₁Masiphakamise izinhliziyo zethu nezandla zethu

sikuphakamisele kuNkulunkulu ezulwini, sithi:

₄₂“Sonile, sakuhlubuka,

Wena Nkosi awuzithalaliselanga izono zethu.

₄₃“Uzembese ngolaka, wasixosha,

wabulala, awaze waba naluzwelo.

₄₄Uzifihle efwini,

ukuze imikhuleko yethu

ingafinyeleli kuwe.

₄₅Usenze saba yizibi nemfucumfucu

phakathi kwezizwe.

₄₆“Zonke izitha zethu ziyasiklolodela.

₄₇Sehlelwe wuvalo,

sizungezwe yimigodi;

ukubhujiswa nencithakalo kuphezu kwethu.”

₄₈Kugobhoza imifula yezinyembezi

emehlweni ami,

ngenxa yokubhujiswa kwendodakazi yabantu bami.

₄₉Amehlo ami agobhoza izinyembezi,

azinqamuki, azinamkhawulo;

₅₀aze abheke uSimakade,

abone esezulwini.

₅₁Lokho okubonwa ngamehlo ami,

kuyayihlubula inhliziyo yami,

ngenxa yalokho okwenziwe kwabesifazane

bomuzi wakithi.

₅₂Abangizondela ize,

bangizingelisisa okwenyoni.

₅₃Bangiphonse emgodini,

bawugcika ngamatshe.

₅₄Amanzi angigubuzela ikhanda.

Ngathi: “Kuphelile ngami!”

₅₅Ngakhuleka kuwe, Simakade,

ngisemgodini phansi.

₅₆Walizwa izwi lami lapho ngithi:

“Ungayisithezi indlebe yakho

ekunxuseni kwami, ngicela usizo.”

₅₇Lapho ngikubiza, ngicela usizo,

weza kimi, wathi:

“Ungesabi.”

₅₈Nkosi, uyimele indaba yami,

wayihlenga impilo yami.

₅₉Simakade, ukubonile okubi okwenziwe kimi;

yehlulela, ungimelele.

₆₀Ukubonile ukulangazelela kwabo

ukuba baphindisele,

nawo wonke amacebo abo ngami.

₆₁Uyizwile yonke inhlamba

abangethuke ngayo, Simakade,

nozungu abangakhele lona.

₆₂Bakhuluma futhi bacabange nto yinye nje:

ukuthi bangangilimaza kanjani.

₆₃Noma behleli noma bemile,

ngiyihubo labo lokukloloda.

₆₄Simakade, uyaphindisela kumuntu

ngokwemisebenzi yakhe;

ngiphindiselele kubo ngabakwenze kimi!

₆₅Bashaye ngobumpumputhe,

udide imiqondo yabo,

beka isiqalekiso sakho phezu kwabo!

₆₆Baxoshe ngentukuthelo yakho, ubabhubhise,

kungasali namunye phansi kwezulu likaSimakade.