UMikha 2

labo abahlela ukwenza ububi

besemibhedeni yabo,

kuthi ekuthatheni kokusa bakwenze!

Ngokuba kusemandleni ezandla zabo

ukwenza lokho.

₂Bafisa amasimu, bawaqhwage,

nezindlu bazithathe,

bacindezele indoda nabendlu yayo,

umuntu nefa lakhe.

₃Ngakho-ke usho kanje uSimakade, uthi:

“Niyabona-ke, lo mndeni

ngiwuhlelela inhlekelele,

eningayukukhipha izintamo zenu kuyo,

futhi aniyukuhamba ngokuziqhayisa,

ngokuba kuyakuba yisikhathi esibi.

₄Ngalolo lusuku bayakusho isaga ngani,

bakhihle isililo, bethi:

‘Kuphelile, kuphele nya ngathi;

isabelo sabantu bami sinikwe abanye abantu!

Maye, usithathile kimi,

amasimu ethu wawabela amahlubuka!’ ”

₅Ngakho-ke akuyukubabikho kini

ophonsa intambo yokulinganisa ngonkatho

ebandleni likaSimakade.

₆“Ningaphrofethi,” baphrofetha, bathi:

“Akufanele niphrofethe ngalokho;

asiyukuthelwa ngehlazo.

₇Kungashiwo yini nina ndlu kaJakobe

ukuthi uMoya kaSimakade

uphelelwa yinisineke

noma lezi yizenzo zakhe na?

Awamahle yini amazwi ami

kohamba ngobuqotho na?

₈Akukapholi maseko abantu bami

sebephenduke isitha;

bahlubula ingubo esembathweni

salabo abadlula bethi baphephile,

bebuya empini.

₉Nixosha abesifazane babantu bami

ezindlini abazithandayo;

nithathe ezinganeni zabo

inkazimulo yami yaphakade.

₁₀Sukumani nihambe,

ngokuba lena akusiyona indawo yokuphumula,

ngoba ingcolile,

iyakuqotha imbokodo nesisekelo kabi.

₁₁Ukuba bekukhona ohamba

ekhuluma udwadwa namanga,

aqambe amanga athi:

‘Ngiyakuniphrofethela ngewayini

nangophuzo olunamandla,

ubeyakuba ngumphrofethi walaba bantu.’ ”

₁₂“Impela ngiyakumqoqa wonkana uJakobe;

ngiyihlanganise ndawonye

ngempela insali yakwa-Israyeli,

ngiyiqoqele ndawonye njengezimvu esibayeni,

nanjengomhlambi phakathi edlelweni lawo,

kube nokuxokozela kwabantu.

₁₃Obavulela indlela uyakuhamba phambi kwabo.

Bayakufohla, badlulele esangweni,

baphume ngalo.

Inkosi yabo isidlulile phambi kwabo,

uSimakade useyinhloko yabo.”