UMikha 5

₁Viva ngamabutho ndodakazi,

kukhona osivimbezelayo;

umehluleli ka-Israyeli bayakumshaya esihlathini.

₂“Kepha wena Bhethlehema Efratha,

nakuba ungomncinyane emindenini yakwaJuda,

ngiyakuvusa oyakuvela kuwe,

uyakuba ngumbusi kwa-Israyeli,

ondabuko yakhe ngeyasemandulo,

ezinsukwini zaphakade.”

₃Ngakho-ke uyakubakhaphela

kuze kube yisikhathi sokuba

okhulelweyo abelethe.

Kuyakuthi lapho esebelethile,

abafowabo abaseleyo babuyele

kubantu bakwa-Israyeli.

₄Uyakuma, eluse ngamandla kaSimakade

nangobukhulu begama likaSimakade

uNkulunkulu wakhe.

Bayakuhlala bevikelekile,

ngokuba uyakuba mkhulu

kuze kube semaphethelweni omhlaba.

₅Lokhu kuyakuba ngukuthula:

kuyakuthi lapho i-Asiriya litheleka ezweni lethu,

linyathela ezinqabeni zethu,

simelane nalo ngabelusi abayisikhombisa

nangezikhulu zabantu eziyisishiyagalombili.

₆Bayakubusa i-Asiriya ngenkemba,

nezwe lakwaNimrode ngezintuba zalo,

Uyakusihlenga e-Asiriya,

lapho litheleka ezweni lethu,

nalapho linyathela emingceleni yethu.

₇Insali kaJakobe iyakuba

phakathi kwezizwe eziningi

njengamazolo avela kuSimakade,

nanjengezihlambi otshanini ezingalindeli muntu,

nezingahlaleli bantwana babantu.

₈Insali kaJakobe iyakuba sezizweni,

kubantu abaningi,

njengengonyama iphakathi kwezilwane zehlathi,

nanjengewundlu lengonyama

liphakathi komhlambi wezimvu,

elithi uma lidabula phakathi kwawo,

linyathele, linephunephuze,

kungabi bikho ohlengayo.

₉Masiphakanyiswe isandla sakho

phezu kwezitha zakho,

ziqedwe nya zonke izitha zakho.

₁₀USimakade uthi:

“Kuyakuthi ngalolo lusuku,

nginqume amahhashi akho onawo,

ngiqede nya ngezinqola zakho.

₁₁Ngiyakubhidliza imizi ezweni lakho,

ngizicekele phansi zonke izinqaba zakho.

₁₂Ngiyakushabalalisa ukulumba

okwenza ngezandla zakho,

kungabe kusababikho ababhula kuwe.

₁₃Ngiyakunquma izithombe zakho ezibaziweyo

nezinsika zakho onazo,

ungaphindi futhi ukhothamele

imisebenzi yezandla zakho.

₁₄Ngiyakusiphula izinsika zo-Ashera bakho onabo,

ngishabalalise imizi yakho.

₁₅Ngiyakuphindisela ngentukuthelo nangolaka

ezizweni ezingalalelanga.”