UNahumi 2

₁Lowo ocekela phansi uzokuhlasela,

qapha inqaba,

ubheke emgwaqweni,

uqinise ukhalo,

uqinise izikhwepha ngokwedlulele.

₂Ngokuba uSimakade uyakubuyisa udumo lukaJakobe

njengodumo luka-Israyeli,

abacekela phansi babaqothulile,

bashabalalisa namagatsha abo.

₃Izihlangu zamabutho akhe zibomvu,

amadoda anamandla agqoke okubukhwebezane,

izinqola zensimbi zibengezela

umlilo ngosuku azilungiselela ngalo,

imikhonto iyaveva.

₄Izinqola zenza njengezinhlanya emigwaqweni,

zigijima ziya le nale;

ukubonakala kwazo kunjengezibani,

zigijima ziphambana njengemibani.

₅Usekhumbula izikhulu zakhe,

ziyakhubeka ohambeni lwazo,

ziphuthuma ongangeni lwakhona,

izivikelo ziyalungiswa.

₆Amasango emifula asevuliwe,

isigodlo siyabhidlika.

₇Kunqunyiwe ngalo,

liyambulwa, liyathunjwa,

nezincekukazi zalo ziyalila

njengokukhala kwamajuba,

azishaya phezu kwezinhliziyo.

₈Kepha iNineve lifana nechibi lamanzi

kusukela ezinsukwini zalo,

nokho bayabaleka.

Yimani, yimani!

Kodwa akukho namunye ophendukayo.

₉Phangani isiliva!

Phangani igolide!

Ngokuba akupheli okubekiweyo ngobuningi,

nakho konke okuyigugu.

₁₀Alisenalutho, kukhala ibhungane,

futhi liyincithakalo,

inhliziyo iyancibilika,

kushayana amadolo,

izinhlungu zikhungethe lonke ukhalo,

nobuso babo bonke buphaphathekile.

₁₁Uphi umphandu wezingonyama,

nedlelo lamawundlu ezingonyama,

lapho kwahamba khona ingonyama

nengonyakazi newundlu lengonyama,

lapho kungekho khona okwesabisayo na?

₁₂Ingonyama yadwengula okwanele amawundlu ayo,

yakubamba entanyeni okwengonyamakazi yayo,

yagcwalisa umgodi wayo ngenyamazana,

umphandu wayo ngenyama edwenguliwe.

₁₃“Uyabona-ke, ngimelene nawe,

ngiyakushisa izinqola zakho entuthwini,

inkemba ibhuqabhuqe amawundlu akho,

ngiyakuyiqeda nya inyamazane yakho ezweni,

nephimbo lezithunywa zakho

aliyukuphinde lizwakale,” kusho uSimakade.